BJP-i Citizenship (Amendment) Bill agizüktsü

New Delhi, April 8 (Agencies): Election nung maneni sorkar akümtsü tashi ngura Bharatiya Janata Party (BJP)-i Citizenship Amendment Bill (CAB) benoktsü ta Hombarnü metetdaktsü.
BJP-i aniba NDA sorkari tanaben tashi ngura Parliament nung CAB agizüktsü, ta Union home minister Rajnath Singh-i ashi.
“Onoki Parliament nung Citizenship (Amendment) Bill benoka agizüktsü merangtsü aser onokisa northeast indang maitsü wazüka yutsütsü” ta BJP indang election manifesto sayadang Rajnath-i ashi.
Tanü New Delhi nung aliba party headquarters nung BJP-i election manifesto saya. Iba sentong nung Prime Minister Narendra Modi, Union external affairs minister Sushma Swaraj, BJP national president Amit Shah aser tanga lennirtem aden.
“Kidanger linüktem nung telok tilatem reshikangshiba nungi kümzüktsü atema onoki Citizenship Amendment Bill agizüktsü. Northeastern state tem nung alirtemi CAB atema tebilemtsü abenba onüktem onoki jembiteptsü. India den kidangsüa aliba linüktem nung Hindu, Jain, Buddhist aser Sikh nunger nem India senso agütsütsü” ta BJP indang manifesto nung shia lir.

NESO-i BJP manifesto aitsür
Shillong, April 8 (Agencies): North East Students’ Organisation (NESO)-i BJP indang Lok Sabha election manifesto aitsü.
“Nisung shinga nema onok tarutsü putu atema lendong bentsür marudaktsütsü aser onoki iba atema inyakba mapa manentsü” ta NESO Chairman Samuel Jyrwa-i Hombarnü metetdaktsü.
“BJP-i Northeast nung aliba lisopurtem atema mebilemtsür ta iba inyakyim ajanga sayur. Onok li nung onok telok tilaba kümdaktsütsü meranger aser iba inyakyim aitsür” ta paisa ashi.
“Bendanger kaji Muslim nunger mesüra Hindu nunger ka süang, bendangersa asütsü” ta NESO-isa metetdaktsü.