Candidate tajung melira NOTA vote enokjang

Hyderabad, April 9 (Agencies): Lok Sabha election jakdang Hyderabad nung apuani kati nüboyima senzür. Ajisüaka, tenati political party mesüra candidate atema masü saka NOTA atema nübo ayimer.
Apuani na ya Swathi aser Vijay lir aser tenati vote agütsürtem dang candidate tajung melira NOTA (none of the above) option nung vote enokjang ta ayongzüker.
Tenatisa National Highway 65 (Vijayawada-Hyderabad) nung atsü aser board tazüngtem nung aser Hyderabad kübok tesem kar nung ‘Honest politicians missing? Think of NOTA’ (Ochishir politicians mali asü? NOTA bilemtetang) ta osang zülur prokshir.
“Politicians ajakbo ochimashirtem masü ta künati agizüker. Saka nai candidate ka nem nü indang vote magütsüdang, nenoki shiba nem vote enoktsür’ar jungjunga bilemdaktsünür. Nai vote enoktsüba candidate jagi MLA tajung ka ama mapa meinyaktsü ta nai bilemra, NOTA button nung nemang” ta Swathi-i ashi.
“NOTA votes anguba ajanga election results nung temelenshi balaka bentsür marutsü akok saka tanü asen linük nung politics tamajung inyakba magizüker ta sayua nisungtemi NOTA nung votes enoktsütsü nüngdaker” ta Vijay-ia ashi.