NSF-i CAB anemba maneni nenshir

Dimapur, Rongchii/April 10 (TYO): Kaketshir lokti aser Naga nunger lanurtem tenüng nung nokdakba Naga Students’ Federation-i mapang aben ozüng alema bendanger senoka aitba ken o tebilemtsü kaa jembiogo.
NESO den külemi NSF puri India sorkar dang Citizenship Amendment Bill, 2016 (CAB) ajanga timtem bener arutsütsü aliba indang metetdaktsüogo aser bill ya agizükra North East nung aliba lisopurtem dang kongshitsü ta shiogo.
Maneni Bharatiya Janata Party (BJP), Election manifesto koba April 8 nü Ato Kilonser-i sayaogo, iba nung BJP puri tanaben sorkar kümtetra Citizenship Amendment Bill benoktsü asoshi benoka aliba ngua Naga Students’ Federation tebilemtsü kaa bilemer.
Anungji BJP puri parnok ajangzüktsü mechi NE nung aliba nüburtem bendanga agütsüba, koba parnok manifesto nung benoka lir iba onük anema NSF pur maneni nokdaker.
Naga Students’ Federation-i maneni iba bill anema nokdakba jangjashitsür. Onoki Citizenship Amendment Bill anemer aser tashi angutsü kicha atema tarutsü putu asoshi mebilemdangi ken o sendoka metoktsütsü asoshi political party tem dang mepeshir, ta tir Kesosul aser General Secretary Imtiyapang Imsong nati sangdong ka ajanga metetdaktsü.