Zubeen-i ‘Citizenship Bill’ anema maneni ola adok

Guwahati, Rongchii/April 10 (Agencies): Lanurtemi kanga sapuba nüngtugu kentener Zubeen Garg-i Citizenship Amendment Bill anema nokdakba maneni metetdaktsüogo aser Bharatiya Janata Party(BJP) pur aija ashiba agi, kechi tia ajurudir ajuruaka pai iba bill anema nokdaktsü.
2019, April 8 nü BJP puri 2019 Lok Sabha elections atema manifesto sayaogo. Iba Manifesto nung BJP puri Citizenship (Amendment) Bill benoktsü asoshi parnok bendanga agüja aliba jangjatsüogo koba ajanga Northeast ajung anokshidaktsü. Kidanger linük tem nungi tamangba yimsü tsütsü rishikangshirtem kümzüka ayutsü atema paroki sorkar kümtetra bill ya benoktsü ta shiogo.
BJP pur tamendakdak indang jembidang kentener yagi ashiba agi, “BJP puri sorkar kümtetra parnoki iba bill benoktsü asoshi mulungteter lir aser iba bill ya agizüka ozüng kümra state nung tensa tamajungba akümtsü kechiyong asenokia iba anema nokdaktsü. Asenoki iba bill anema maneni raratsü. Tensa mapang agi bener arutsüra kü kija süaka ni iba bill anema raratsü.”
Parliament nung Citizenship Bill benokba mapang nungi Garg-i yimjak nung bill anema nokdakba lemsatepa aruogo. Paisa Minister Sarbananda Sonowal dangi shiti ka dena züluogo.
Lok Sabha nung Citizenship (Amendment) Bill, 2016 agizükba sülen Zubeen Garg-i Assam Chief Minister Sarbananda Sonowal dangi Facebook ajanga shidi ka zülutsü. Bharatiya Janata Party (BJP) pur 2016 küm Assembly election pai atenba election ken; Sokolure Ananda Sarbananda amshia vote anguba ajaka pa nem meyipa agütsütsü Zubeen-i akhang. Paisa iba ken atentsü atema sen pa nem agütsüba agütsütsü meyipa agütsütsü mulunga aliba lemsatep.
Pa All Assam Students’ Union den longjemer Citizenship (Amendment) Bill, 2016 anema nokdakogo. Assam nunger nüngtugu kentener yagisa iba bill anema Politics Nokoriba Bondho (Don’t do politics, friend) ken mejemogo.
Citizenship Act, 1955 amend asütsü atema Citizenship Bill ya Lok Sabha nung 2016 küm benok. Iba bill ajanga Afghanistan, Bangladesh aser Pakistan nung Hindu, Sikh, Buddhist, Jain, Parsi aser Khristan yimsü dak amanger ozüng alema linüki aita alirtem nem lisopur jenjang agütsütsü asoshi meranger.