SC-i Rafale indang auyaba kulikakettem agizüker

New Delhi, April 10 (Agencies): Rafale onük atema mepishirtemi kulikaket kar agütsüba atema Centre-i ashishitep saka Supreme Court-i tanü kulitemji agizük.
Kulikakettemji The Hindu newspaper-i mezüng yimjak nung sangdong aser iba sülen news agency ANI-i osang prokshi.
Kulikakettemji “national security” atema lendong keta lir aser ozüng alema photocopy asüba aser osang temai adokdaktsübaji Indian Penal Code kübok arrlatemi aitsür ta Centre-i ashi.
Supreme Court-i kulikattem reprangtsü ta ashiba sülen minute ishika dang lir Congress-i miimmechi inyakba mapa temai adokdakar aser bushisüngdang ka tenzüktsü ta metetdaktsü.
Bodbarnü Congress president Rahul Gandhi-i Amethi nung nomination asüba sülen “SC tetuyuba pela agizüker aser okadaki temeten agütsüogo” ta ashi.
Rahul-isa iba onük atema yimjak nung o atsüteptsü jazük. “PM Modi-i shimba tesem ka nung ni o atsüteptsü mulunga lir. Iba mapa nung miimmechi inyakba kuli lir. Pai IAF indang sen Anil Ambani nem agütsü. Tanü SC-i tetuyuba agütsüba ajanga chowkidar-i auyaba jungkai adoktsür” ta Rahul-i ashi.
SC-i tetuyuba agütsübaji India atema takok lir. Supreme Court-i Rafale petition meyipa reprangshitsü obendang agütsüba onoki pelashishia agizüker, ta tanü Congress-i metetdaktsü.
“Rafale miimmechi mapa ka khen ka ta temai adoker. Supreme Court tangatetba shitak nung noktaka lri. Rafale miimmechi onük temai adokba atema Modi-i independent Journalist tem anema Official Secrets Act ozüng benoktsü amokmeren. Nai tiyazü jembia jenshitsü akok saka tatem nungbo ochi jungkai adoktsü aser tangbo jenoktsü atema ‘official secrets act’ kecha mali” ta Congress indang chief spokesperson Randeep Surjewala-i ashi.
“Na shisa tebulu Modi. Nai aginü yonga mesüra maginü nunga joko bushisüngdang ka tenzüktsü” ta Surjewala-isa shisem.