Nashishi atema züka merenshiba anema ola adoker

Guwahati, April 10 (Agencies): Assam kübok Bishwanath nung nashishi atema züka merenshiba tatalokba nung shilem agir police-i puogo.
Tang tashi nung police-i iba tasa atonga inyaksang Dipen Gogoi züngsema nisung pezü pua lir.
“Bishwanath ken o atema police-i ano nisung asem puogo. Tanüngba nisungtem aputsü atema bushitepdar” ta Assam police-i parnok indang Facebook page nung metetdaktsü.
Yashi All Assam Minorities Students’ Union (AAMSU)-i Chief Minister Sonowal dangi shidi ka züluba nung iba mapa inyakertem merenshitsü aser tatalokba bushisüngdang atema takhangba agütsü.
Bodbarnü All India United Democratic Front indang kongsang United Democratic Student Front (UDSF) Hojai district committee-i deputy commissioner indang office kima Shaukat Ali züka merenshiba anema lungkak ait.
Taoba Deobarnü Assam kübok Biswanath Charali nung arishi küm 68 tain Shaukat Ali züka merenshiba anema parnoki lungkak aitba sentongji agi.
UDSF Hojai district committee president Atikur Rahman aser general secretary Habibur Rahman na den züngsemtemi deputy commissioner nem memorandum ka agütsü.
Iba nung parnoki aibelenertem aputsü aser ozüng tesashi agi merenshitsü takhangba agütsü.
Hojai DC ajanga UDSF-i memorandum indang copy ka ka Assam chief minister, Assam Director General of Police aser human rights organization dangia yok.
Ghonda 24 tsüngda mapa kecha meinyakra onoki state ajungalen lungkak aittsü, ta UDSF-isa metetdaktsü.
Maneni, tanü Civil society organization temi Guwahati nunga lungkak aitba sentong ka ayonga agi.
Shaukat Ali dak züka merenshiba dang masü saka pa nem akshi dena chidaktsü ta osangtem ajanga ashir aser iba atema nisungtemi ola adoker.
Ali ya küm 40 tashi Assam nung liyonga arur aser restaurant ka lapoka lir. Iba restaurant nung nashishi ayoker saka nisung telok kati pa züka merenshi.
Ali-i ashiba agi par kibongi küm 35 tashi restaurant business inyaka arur.
Pa züka merenshiba anogo matongdang anogo asemnü jakdang tebur 15 shi ka par restaurant-i atu aser nashishi kong lir ta asüngdang ta Ali-isa ashi.
“Ni nashishiji taktang balaka nung ayu. Parnoki nashishi bushi aser angu. Parnoki video agi aser iba jagi ni tetsübu nung mahaldar indang office-i ao” ta paisa osangbener dang ashi.
Mahaldars (market managers)-i pa dang nashishi mayoktsü ashi aser iba sülen nungi nashishi mayok ta paisa shisem.
“Kasa asangur telokji hotel-i arur kü dang nashishi ayoker asü masü ta asüngdang aser ni mayoker ta langzü. Parnoki nashishiji mangu. Iba sülen Maina ta ser mahaldar ka kü dangi aru aser ni paan dokan kati anir ao aser kü kija ora lendong ajurutsü akok anungji idak nung jagi maotsü atema ashi” ta Ali-i ashi.
“Ni ghonda ka ser tesadang ka ikdak nung jagi mao ata saka kasa asangur telokji aru aser ni school kati aitsür orr züka merenshi” ta paisa shisem.
Asangur telok denji Maina-i tesentaktep liasü ama Ali-i temulung melemi bilemba olen ka ashi.