Odisha nung seret 50 landmine ka angu

Bhubaneswar, Rongchii/April 10 (Agencies): Lok Sabha election 2019 agitsü anogo ana lia Odisha kübok Maoist pur kanga bulua inyaksangshiba Gajapati district nung police temi Mongolbarnü landmine seret 50 ngutetogo.
Gajapati superintendent of police Sarah Sharma-i ashiba agi, landmine ya Adaba police station kübok aliba Paniganda yimtsüng anasa apu ka kübok nguteta liasü.
“Security personnel temi apu ka kübok landmine yuja aliba ngutet. Wire talangka anguba sülen iba wire bushiyonga aoba mapang apu nung landmine aliba ngutet. Iba bomb ya Maoists puri election nung timtem agütsütsü asoshi toktsü asütsü ta temulung melemi bilemer,” ta Sharma-i ashiba den bomb defused sütsüogo ta shisem.
Maoist puri timtem agütsüba, Gajapati, Malkangiri, Koraput, Rayagada aser Nabarangpur district nung Lok Sabha election mezüngbuba phase nung April 11 nü election agitsü.
Odisha director general of police (in-charge) BK Sharma-i, Maoist puri kongshir aliba district tem nung aliba superintendents of police tem dang kümküma alitsü tuyuogo.
Communist Party of India-Maoist puri candidate tem ya tashioktsürtem shia prokshiba poster tem Malkangiri district nung Mathili tesem nung nguogo aser nüburtem dang vote magütsütsü asoshi shiogo.
“Candidate temi election mapang nung dang district nung kinük nung aliba tesemtem semdanger aser iba sülenbo parnok samaadoker. Parnok dak tamang teka aser election nung shilem tagi,” ta CPI-Maoist, Darbha Division Committee-i mataktsüba poster nung züluja lir.
Nüburtem tepsettsü amokmerenba iba amala mesükba poster tem Koraput district kübok Boipariguda tesem nung April 2 nü nguogo.
Election Commission ketdangsertemi ashiba agi, election mezüngbuba phase nung polling booth 8,872 nungi 2,375 bo timtem aliba tesemtem ta metetdktsüogo.
Border Security Force (BSF)-i Bodhbarnü Maoist puri kongshir aliba tesemtem nung aliba nüburtem dang vote agütsütsü asoshi mepeshiogo.
BSF battalion teku item tesemtemi yoker lir.
Odisha kübok constituency 21 nüng election mezüngbuba phase pezü nung election agitsü.