Nagaland nung nisung 12.13-i tanü vote agütsütsü

Kohima, April 10 (TYO): Chief Electoral Officer (CEO) Nagaland, Abhijit Sinha, IAS-i Nagaland nung vote agütsürtem dang Lok Sabha elections aser 26-Aonglenden Assembly by-election nung tetsübu kecha melii vote agütsütsü mepishia metetdaktsü.
Nagaland nung vote agütsür nisung 12,13,777 dang tangari mesüzükba agi masü saka pei mulungsentsü agi mulungba nem vote agütsütsü atema Sinha-isa ayongzük.
Asüng Lok Sabha menden aser 26-Aonglenden Assembly Constituency indang by-election tiptema agitsü atema mapa ajak renemogo, ta paisa shisem.
“Nagaland nung tensa süngjema dang lir aser polling party ajak pei pei lemzükba polling stations-i apusoa ogo. Parnoki mapang shitak nung election district 12 kübok polling stations 2227 tonga mapa inyaktsü imlar,” ta CEO-i osangbener den jembidang ashi.
Central Armed Police Force, IR, State Police aser Home Guards dena sepai company 75 den village guards 1000 dak tema polling stations nung mapa lemzüktsüogo, ta paisa ashi.
March 25, 2019 tashi nung Nagaland nung vote agütsür ajak agi nisung 12,13,777 liasü. Iba ya 2014 Lok Sabha election dang nungi vote agütsür 30,805 agi teimba lir, ta Abhijit Sinha-isa ashi.
Vote agütsürtem rongnung tetsür 5,98,503 aser tebur 6,15,274 lir, ta paisa ashi.
Taküm Lok Sabha election nung candidate temji- INC nungi K L Chishi, PDA consensus candidate & NDPP nominee Tokheho Yepthomi, NPP nungi Hayithung Tungoe aser Independent candidate Dr M M Thromwa Konyak lir.
26-Aonglenden Assembly indang by-election nung Congress candidate Alemjongshi Longkumer aser NDPP candidate Sharingain Longkumer tsüngda tokteper.
April 11, 2019 anepdang 7:00 ako nungi nikongtsütsü 4:00 ako tashi polling agitsü. Polling stations 450 tashi ‘critical’ aser ‘vulnerable’ ta ajiteta lir aser itemji web streaming o offline videography ajanga reprangtsü, ta CEO-i ashi.
Nagaland nung Model Code of Conduct tenzükba sülen Rs 92,26,240 tashi puogo, ta paisa shisem.
Sen, yi litre 64,416.689 aser Rs 3,08,75,248 alang narcotic drugs apuba ajak bendenba ajanga Rs 92,26,240 ji ajunger. Iba ya 2014 Lok Sabha elections nung apuba dang nungi kanga agi teimba lir, ta Abhijit-isa metetdaktsü.