Manipur journalist Kishorechandra Wangkhem chiokogo

Imphal, April 10 (Agencies): Anogo 134 tashi tepuokdak ayuba sülen Bodbarnü Manipur journalist Kishorechandra Wangkhem chiokogo.
Manipur chief minister (CM) N Biren Singh ya New Delhi nung Hindutva sorkar indang puppet ka ta social media nung sangdongba atema tai tonglokja November 27, 2018 anogo nungi Wangkhem tepuokdak ayu.
Anogo ana tejakdang Manipur High Court-i National Security Act (NSA) agienba sülen Wangkhem chiok.
Tanü pa kinungtsü Ranjita aser pa atema o jembitsür S Chittaranjan nati pa pelaa agizük.
“Ni kanga pelar. High Court-i obendang agütsüba nung ni temulung asür, kechiyong oakdaki ‘freedom of expression and speech’ indang temeten mesamadaktsü” ta Wangkhem-i ashi.
“Tang aliba sorkari nübortem indang ola nembangtsütsü merangba anentsüla. Ni tamangba yimsü tsütsü telok tilaba ka nungi lir aser iba jagi ni iba sorkar mekümtetdang yongi sorkar aija aru” ta paisa ashi.
“RSS aser BJP indang tangatetba nung telok tilatem atema lendong keta lir. Iba jagi ni parnok aitsür. Mapang ka kü dang Facebook post ka agientsü atema ashi aser ano tatalokba ka nung BJP MLA ka indang escorts-i ni züka merenshi. Anungji ni journalist ka aser human rights posemer ka ama inyaktsü” ta Wangkhem-isa metetdaktsü.
“Iba rara nung kü kinungtsü nem tenüngsang agütsür kechiyong lai kü den külemi noktak” ta paisa ashi.
“Ni temulung anisüngzüker. Iba inyakyim meinyakdaktsünür aser nübortem dang speech & expression kümzüka yudaktsünür” ta Wangkhem tebutsü Ranjita-isa osangbener dang ashi.
“Iba ya nisungtem, par tasütait kibong aser parnok atema jembitsür lawyer külemi longjemer inyakba ajanga takok anguba lir. Onoki iba onük U.N nunga benokogo aser parnoki India sorkar dangi zülu” ta Human Rights Alert, Director Babloo Loitongbam-ia tanü ashi.