EC-i Modi indang film aser NaMo TV noktanger

New Delhi, April 10 (Agencies): Lok Sabha elections matongdang political party ka ajungkettsü atema biography mesüra poster mesüra publicity kecha mesayatsü atema tanü Election Commission-i tenokdangba agütsüba nung Namo TV dena lir.
24-hour channel Namo TV ajanga Prime Minister Narendra Modi aser BJP ajungketer.
Lok Sabha election metembang tashi ‘PM Narendra Modi’ indang film mesayai atatsü atema tanü Election Commission-i tetuyuba agütsü.
Central Board of Film Certification (CBFC)-i Lok Sabha polling mezüng shilem agitsü aliba Brihostibarnü (April 11) nü film sayatsü atema temelaba agütsüba sülen ghonda ishika lir EC-i iba tenokdangba agüja liasü.
Taoba anogo 10 tashi Namo TV atema ashishitepa arur kechiyong parnoki satellite ajanga uplink aser downlink asütsü atema sorkar dang nungi license memeshii dang sayur. Iba inyakyim anema Opposition party temi ola adoker.
TataSky-i mezüngbo NaMo TV dang “Hindi news channel” ka ta jaloktsü saka mapang tatsüka lir iba channel ya “special service” ka melena sangoktsü.
Opposition party temi Election Commission dangi NaMo TV anema shidi zülu aser tanü iba tetuyuba agütsüba pelashishia agizüka liasü.
“Election Commission-i iba telemtetba agiba atema pelar. Sorkar yimsü asüba party-i iba ama linük maaksüja mapa inyakbaji tesempatsüka lir” ta Congress lennir Sanjay Jha-i ashi.