Kohima Police-i temesepba mozü belener ana apu

Dimapur, Rongchii/April 11 (TYO): April 11 nü Khuzama Inter-State Police Check Gate nung Kohima police-i gari tem mita aoba mapang gari ka apu (Mahindra Bolero NL10-5432) aser gari nung brown sugar asütsü ta temulung melemi bilemba packet 60 soap case tem nung inoka bener aliba nguteta liasü.
Temesepba mozü ya gm 900 shi asütsü. Mozü den külemi 12 bore gun injang ana aser injang tapong ana ngutetogo.
Iba dak sendakba nung Manipur, Senapati district kübok Leyai yimtsüng nungi asür Weikho’er jabaso Aharavi (21 yrs) aser Punei’er jabaso P. Zaisho (27 yrs) puogo aser Khuzama PS nung ken o maneni bushisüngdangtsü atema benokogo, ta PRO, DEF Kohima sangdong ka ajanga metetdaktsü.