Angh Acharya-i benjung salem lemsatep

Dimapur, Rongchii/April 12 (TYO): Nagaland Angh, PB Acharya-i Rama Navami, Rongali Bihu, Vishu aser Vaisakhi benjung salem nüburtem aser talisa Nagaland nung aliba Hindu, Assamese, Malayali aser Bengali nunger tem den lemsatep.
Pai ashiba agi, Rama Navami ya Hindu nunger benung ka lir koba ajanga lord Rama asoba bilemteta amunger. Lord Rama ya jenjang temaba yimyayimpongtem jungkai adoka sayuba temaitsüka lir ta shia Angh Acharya-i pa dak nungi tatishitsü agia nisung ajak lenmang shidaki anitsü imlaba lemsatep.
Salem osang lemsatepba den Angh-i iba benjung ajanga state nung yimji yimjung, terenlok, aser telungjem adokdaktsütsü imlaba lemsatepa liasü.
Item benjung ajak ya state balala indang sobaliba maitsü lir ajungji iba ya wazüka ayutsüla ta ashiba den, Angh-isa benjung ajanga nüburtem tamangba yimsü mesera taküm jenjang mebendangi longjemdaktsür, ta ashi. Linük tashi ita yangertsü asoshi temelenshi bener arutsür kaka akümtsü asoshi pai nüburtem ayongzük.
Maneni Angh Acharya-i, item benjung amungba ajanga nüburtem tsüngda temeimtep aser jungnütepba tali adokdaktsütsü aser linük nung aliba nüburtem ajak nem yimji yimjung bener arutsütsü imlar, ta ashiba, Governor PRO sangdong ka ajanga metetdaktsü.