Election tajungba agiogo

Nagaland nung election tajungba agitsü jembia jembia yakanü agiba election-bo tamalen agiba election dang nungi terabo tajungba agitetogo. Atangji, asenok ajaki election kanga merüka aginüyonga, tang tashi nung asenoki agiyonga aruba election-tem ya kanga mejungisa agiyonga aru asünungji, asenok tangatetba aser inyakyim ajak kanga menena lir, anungji ibaji khenyongi merüktettsübo tasak asütsü. Atangji, tang agiba election nunga tesem kar nungbo tashiyim amshiba osanga angazüker, ano kar nungbo akhi ama ajak tenüng nung kari dang ajenba osanga lir, ano tebilemdangtsü onük kaji tesem aika nung kibong shia nisung kati dang ajak meyong vote ajentsüogo. Item osang tamajungtemji yutsür, tepelatsü osangtemji tesem aika nung tantsür tamburtem meji mejir pei kinungertemi polling station tashi anir aruagi pei vote peisasa enokdaktsüba aser ano tang mezüng vote enoktsüdanger lanurtem aikati election nung timi shilem agi tenzükba osangtemji lir. Senso ka asoshi yimten nung temulung süsüa pelatsüba mapa kaji election nung peii yariba candidate adokba takokji asütsü aser ano külen, senso ka asoshi yimten nung tejashitsü anogoji election nung peii asemba candidate madokba anogoji asütsü. Item tepela aser tejashiji yimten nung tangatetba tajung agi süoki ia shilem agirtemi ajangshir. Iba amaji kodang senso shiai yimten nung ochi mulung agi pei tata shilem ta angateta süoki ia shilem agidir, iba anogo nung jagi asen lima nung election kanga junga agi tenzüktsü. Idangjibo election mapang ya asen lima renloktsü asoshi onük bendena jembiba mapang amato kümadoktsü. Iba amaji kodang election agidir, lanurtem nem kechikomala shisaliok agütsütsü aser kechikoma mapatem adokdaktsütsüsa inyak nungang parnoka mapa angutsü aser nübortema tajangzük angutsü ta asüba onüktem jembitsü. Atangji, yakanü agiba election yabo parliamentary election dang liasü, iba jagi balaka süngjem agitetogo. Ajisüaka, joko asenoka election jung agitsü nüngdakba onük nung tangatetba kati arur asünungji, state assembly election-a kodang arudir aruaka ano tang dang nungi tajungba agitsü imlar. Joko, taruba election nungbo candidate-i masü saka nübortemiang election maparen nung amshitsü atema saruteper peii salokba candidate nem tenla agütsütsü bilema alitsüla. Akhidang, election agi tenzükdangbo kibong shiai pei candidate nem süng süngkhu kakabosa bentsü aser kari angati tzüdai otsü ta nübortemi ajungshia aser yaria yimsüsür tajung adokdaktsü. Iba jiluji ajizüka pei pei candidate nem pei pei akok tenla agüja yaritepra, idangjisa election merüka agitettsü aser Nagaland yimten yimsüsüba meden merüka akümtsü. Election merüka agitsü asoshi mapa tuluka nungi masü saka tilaka nungi tenzüktsü. Ibaji candidate tajung Tsüngrem dang meshitsü, vote melen sen meshia magitsü, kechisüdirsüaka pei vote-bosa enoktsütsü aser kechisüdirsüaka tangar tenüng nung vote majentsütsü. Itemji mapa küma inyaktsü atema tangar dang nungi temelaba meshitsü menüngdaker aser tang  asenok dak aketba tashi dang nungi tulubaa menüngdaker. Item teinyaktsütem ya takoktsü aser tang mezüng election nung shilem agirtem nungi tenzüka election maparen dak aketba mapatem ajak küm ishika tsüngda kanga shitak inyakyim kati tanü lanurtemi anir arutettsü imlar. Ojala aser obala nungerbo aika joko election merüka agiba nung shitak manidaktettsüsa taküm raksaogo. Item tsüraburem aika election lu ayimertem dang lir. Election lu ayimertemji election mapang nung candidate dang nungi akok tashi sen aika meshia pei kibong mesütsü bilemertem lir. Lanurtemi iba election sobaliba tamajung ya anendaktsütsüla. Ashiko, asenoki asen sobaliba dak peter ta bilemra, Nagaland nungbo Naga nunger asoshi election agibayim balaka lateta nunga junger. Iba election agibayim tasenba nungji tang asenoki tesem aika nung tangatettep nung benshia aruba ama, kibong shia tenüng nung tebu mesüra tetsüi mesüra mulungtepra chirnur rongnung kati ajak atema enoktsütsüa akok. Atangji, iba ama election agiyim balaka liaka, kibong ka nung ajakibo kasa candidate yaritsü memulungtsüa akok, ajia kecha masü, iba ama kibong nungbo pei vote peisasa enoktsü. Election ya tagitsübasa aser tanübo asenok atema tsükchir tulutibaji election, anungji iba tsükchir ya koktetter asen lima tajungba küma yanglutsü atema election agibayim tapetba ka latettsü asoshia bilemdangtsü junger.