Mulungsentsü agi vote enoktsürtem dang pelar: K Therie

Dimapur, April 12 (TYO): Nagaland nung mulungsentsü agi vote enoktsür ajak dang kanga pelar, ta NPCC President K Therie-i metetdaktsü.
Nisung aikati tamangba yimsü, maitsü, sobaliba, oshi, putiotsü aser libaliro kümzüka ayutsü atema tasütait telemtetba agi aser nenok indang vote ajanga asen linük nung aibelen inyakyim aika metongshitsü aser tarutsü putu yangertsü, ta paisa ashi.
Chichiba vote enoktsür aikatibo shilem magi saka polling tatemlen vote agütsür 78.67% tashi liasü. Iba ya proxy voting ajanga liasü, ta Therie-isa shisem.
‘Model Code of Conduct’, ‘One Person One Vote’ aser arogotemi election merüka agitsü atema mepishiaka Village Councils aser yim lennirtemi proxy votes agi aser NDPP+BJP candidate nem vote agütsü, ta paisa metetdaktsü.
Proxy voting nung tangar tenüng amer vote agütsür, taila mapa inyaker, Model Code of Conduct alema inyaker aser iba ya tamangba tsütsüa temenen mapa ka lir. Süpokrem atema vote agütsürtem aser pei atema dang bilemertem aitsür, ta NPCC president-isa ashi.
Presiding Officers aser Polling Officers-i tamakok nguogo kechiyong parnok aikati Model Code of Conduct tangatetba nung meinyak. Model Code of Conduct aser yimtsüng lennirtemi parnok anishi aser polling station aika nung kibong nungi nisung ka nem dang vote enokdaktsü aser kibong tenüng amer proxy votes mela, ta paisa ashi.
ECI-i tetuyuba agütsüba nung Voter slip + identity card ka nüngdaktsü ta ashi saka presiding officers mesüra polling officers-i iba tetuyuba ama meinyak. Vote agütsür nisung nema parnok tanaben vote agütsüdaktsü aser proxy voting melaba osang aika angashiogo. Iba ama Election Duty nung ketdangsertemi election law benshitsü malang, ta K Therie-isa shisem.