NPF aser ACAUT-i Home Minister aser polling ketdangsertem aitsür

Dimapur, April 12 (TYO): Nagaland Deputy Chief Minister, Y Patton-i election model code of conduct aser clean election yimyim anema inyakba aitsür ta Naga People’s Front (NPF)-i metetdaktsü.
Ozüng alema inyaksangshiba nungi aser talisa election maparen asüngteta ayutsü atema Chief Election Officer, Nagaland-i tekaratiba nung mapa inyaktsü akhanger, ta parnoki ashi.
NPF-isa CEO dang iba polling booth nung mapa lemzüktsüba presiding officers aser polling officers merenshiang ta takhangba agütsü.
31 Riphyim old polling station nung Y Patton-i BJP indang scarf agir polling booth telungi aiba aser vote 8 tashi agütsüba video nung angudang kanga aoksar, ta NPF-i ashi.
Deputy Chief Minister aser Home Department ketdangsüa repranger kati yamai inyaktsü ta onoki meimla. Shitakba agibo pai temzüng-ozüng shitak benshia lanurtem anitsüba sernung mashileni anisar, ta parnokisa ashi.
Election Commission of India (ECI)-i ozüng aika lateta lir aser iba nung polling anogo nung polling booth telongtet metre 200 nung party indang election tamaitsü kecha mamshitsü noktanga lir. Saka Y Patton-i BJP indang scarf agir polling booth telungi ai, ta NPF-isa metetdaktsü.
Video nungjisa Y Patton-i 8 ben tashi proxy voting asüba angur aser iba ya clean election indang takhangba “nisung ka, vote ka” anema lir. Nagaland nung tongtipang lennir kati kodaser tarutsü lanu putu dang iba ama yimya tamajung benshia sayur? ta parnokisa asüngdang.
ACAUT Nagaland: ACAUT Nagaland-ia tanga sangdong ka nung Nagaland Deputy Chief Minister Y. Patton-i tim masüba mapa inyakba aser polling ketdangsertemia pei teinyaktsü meinyakba angudang kanga aoksar ta metetdaktsü.
CEO Nagaland-i iba tim masüba inyakyim atema mapa inyaktsüla aser Y. Patton o election ketdangsertem nem tapet temerenshi agütsütsüla, ta ACAUT Nagaland-i Chief Electoral Officer (CEO) Nagaland aser Election Commission of India (ECI) nem takhangba agütsü.
Electoral roll nung tenüng aiben züluba aser elections mapang tim masüba inyakyim anema onoki jembiyonga arur. Proxy voting aiben asüba, tangar melena vote enoktsüba, nisung kati kibong ajak atema vote enoktsüba, village council temi candidate ka yaritsü sangdongba, tashi amshiba, booth makdokba inyaksangshitem ajanga democracy aser election indang tamendakdak samatsür, ta ACAUT Nagaland-i ashi.
Nagaland nung tashi abener kati pei sünütsü sütettsü akok ta Home Minister-i lanur voter tem dang mapa tamajung inyaka sayuogo. Anungji Election Commission of India-i teinyaktsü tim inyaktsüla aser tarutsü nung yamai mataloktsüsa inyakyim metongshitsüla, ta ACAUT Nagaland-isa metetdaktsü.