Kiphire nung National Science Day ayongzüka agi

Kiphire, April 15 (TYO): April 13, 2019 nü Hopongkyu Memorial Hall, Kiphire nung “Communicating Science for All” omen nung ajemdaker National Science Day mongogo; iba sentong nung tetushi tejaokerji Kiphire Deputy Commissioner, M. Shayung Phom liasü, ta ketdangsertem osang ka ajanga metetdaktsü.
Iba sentong nung shilem agirtem den jembidang DC-i, science ya teshisadangba subject ka lir, anungji kaketshirtemi tasen purapiteta inyaktsüla, ta ajungshi.
Paisa District Education Department danga tarutsü nunga maneni kaketshirtem atema sentong balala ayongzüka agitsü mepishi.
O jembitsü atema jaoker ADC Kiphire, Renny Wilfred, IAS-i, school ajak nungi kaketshirtemi shilem agiba atema pelaba lemsatep.
Paisa, kobi melii Kiphire nung aliba school ajak nung “No Plastic” campaign tenzüktsü, anungji kaketshirtemi shilem tajung agidaktsüner, ta ashi.
Paisa kaketshirtem dang senso tajung kaka akumtsü aser nüburtem ajangzükdaktsütsü atema langkabosa inyaktsü ayongzük.
National Science Day nung school 8-i shilem agi. Exhibition tetoktepba nung Saramati view Modern School nungi Langkuli aser Sumit Saby nati mezüngbuba jenjang angu aser Loyola Hr. Sec. School nungi Sero aser Roshan nati tanabuba jenjang angu.
Ano tasembuba jenjang nung takok angurji Trinity High School nungi Liopila aser Manish Kumar na liasü.
Kasa sentong nung El Beth High School nungi kaketshirtemi ken ka aten aser V/P GHSS, Kiphire, Kekhaho Achumi-i tepela anküp o jembi.
Iba sentong ya Teacher Saramati High school Kiphire, Yanglikohpong leniba nung agia liasü.