China-i Afghanistan den yariteptsü nangzüker: Xi Jinping

Beijing, July 10 (Agencies): China-i tongpang nung amshitsü osettsüset aser mitkar nem terenemshiba agüja Afghanistan den yariteptsü tenangzükba olen ka China Tir, Xi Jinping-i tanü Hokolbar nü metetdaktsüogo.

Xi-i Afghanistan Tir, Ashraf Ghani den Russia nung tanü ajurutepdang iba olenji metetdakja liasü.

Pakistan-i ayonger külen Afghanistan aser Taliban telok na tsüngda yimjung nung alitsü senden ka Pakistan nung tang temendak lir aser iba senden nung China sorkar ketdangsertemia tetendanger ama shilem agiba osang jangjaogo.

Aji oda, Taliban teloki Afghanistan nung küm 13 dak tema timtem tulu bener arutsübaren anentsütsü nükjidong nung Pakistan-i yimjung sendenji ayonga liasü.

Afghanistan nung tensa junga akümba ajanga Afghanistan arrtsülen aser China anülulentiptsütsü Xinjiang region nunga sorkar anemba teloktem azüoktettsü ta nükla ayuba sülen China-i Afghanistan nung tensa tajungba kümdaktsütsü asoshi nungdakba maparen inyaktsü tenzükba osang bushiteta lir.

“Asen linük ana tsüngda security den sentakba amaliteptsüren aliba ajanga linük anapronglai tajungzük tulu ngutettsü. Iba tangatetba nung ozü China-i nungdakba tongpang osettsüset agütsütsü renemba den külemi, Afghan mitkartem nem tongpang raratsü terenemshiba agütsütsüa renema lir,” ta Xi-i ashi.

Brazil, Russia, India, China aser South Africa nunger densemba BRICS senden nung shilem agitsü asoshi Xi-i tan Russia kübok Ufa yimti semdangba osang jangjaogo.

Afghanistan toktsüba West linüktem indang mitkartem melenzüka China mitkartem Afghanistan-i yoktsü sentong mali saka par linük jenjang aser tensa tajungba kümdaktsütsü asoshi China-i melunga lir ta Xi-i metedaktsü.