Wokha nung Fire Service week mungogo

Wokha, Rongchii/April 18 (TYO): Wokha public ground nung April 18, 2019 Hokolbarnü ‘Fire Prevention is better than Fire Fighting’ omen nung ajemdaker Department of Fire & Emergency Services, Wokha-i Fire Service week sentong ketdangsüa agia liasü.
Iba sentong nung Wokha, EAC Riku Khutso-i jembiba mapang pai ashiba agi, asen Naga nunger lokti sasep reprangdangra, mi lendong nungi kümzüktsü aser tekümdangtsü nung tesayubatem kanga anünga lir.
Ibayongji, nüburtem dang iba tekümdangtsü sangdongtsü aser lokti den tesendaktep tajung alitsü atema, iba fire service sentong ya nüburtem dang sayutsü asoshi maongka ka ama agitsü asoshi department dang Riku-i mepishia liasü.
Mi lendong nokdangtsü atema tekümdangtsü meratem agitsü aser iba ama mi lengdong mapang ka nungi jenbotsü atema nüburtem dang tapet tesayuba agütsütsüla, ta Riku-isa ashi.
Iba den bendenloksema, Riku-isa, lokti atema mi lendong nungi tekümdangtsü onük tongtibangtem indang rasa ashi.
Fire department nung inyaker tem nem tenüngsang agüja, Riku-i, asenok anisüngzüka mejanger, kechiyong asenok kümzüka yutsütsü atema item firemen ya aonung sangwa metitemi meranga inyaker,” ta ashi.
Iba sentong agiba sülen, Fire & Emergency Services nung inyakertemi nüburtem dang Rescue techniques aser fire extinguishers amshiba yimyatem sayua liasü.