Kohima nung “National Fire Service Week” amung

Dimapur, Rongchii/April 18 (TYO): Linük nung Fire Services ajunga den “National Fire Service Week” munga Fire & Emergency Services department Nagaland, Kohima puri ‘Fire prevention and fire awareness’ omen nung ajemdaker fire awareness training ka Local Ground Kohima nung April 18, 2019 nü agiogo.
“Fire Service Week”, koda tongtibang iba indang jembidang S.I Chumbemo Patton-i ashiba agi, Bombay Fire Brigade nungi Officers aser Firemen parnok 66-i mibendang parnok taküm bendanga agütsüba bilemteta “Fire Service Day” ya küm shia April 14 nü amunger. Iba anogo ya tasütait firemen tem nem akhüm tetushi agüja ‘MARTYRS’ anogo ama amunger aser kasa anogo, mi ajanga lendong bener arutsüba aser koda kümzüka alitsü item tesayuba lenla balala ajanga lokti nem tangazükba agütsütsü asoshi wazüka ayur. Iba anogo fire safety aser evacuation drills, public lectures, demonstrations, mock drills amala linük ajunga nung agir.
Mi lendong mapang nüburtem tinyaktsü Patton-isa lemsatepa liasü. Lokti nem metetdaktsüba tetuyuba tem rongnung; mi lendong atalokba mapang Fire Services nem idangjisa metetdaktsütsü, Fire Service Telephone numbers mashi mamshitsü, kechiyong aibelenertem merenshir, mi moaraa mao tsüngda Fire Extinguishers amshiba yimya, electrical fire nung tzü mesera totzü mamshi fire extinguisher tapet amshitsüba, lendong tamajungba küma maotsü atema Power department dang power cut asütsü asoshi osang agütsütsüba, mi abendang amshiba garitem kecha tetsükdaktsü makai odaktsütsü asoshi, mi adokba tesem jangjatsü, mi temsepertem dang lenmang tajungba aser tatsütiba sayutsüla, mi adoka aliba tesem nung tzü adokdak bushia agütsütsü asoshi, kidang fire extinguishers, fire alarms, smoke detectors, fire hydrants aser sprinkler systems inoktsü atema aser kibong shia nung fire personnel tem tonga maru tsüngda amshitsü atema tzü bendendak tank tilala yanglutsü aser certified aser standard electrical appliance; wires, plugs, fuse, switches, sockets amala amshitsü densema lir.
Training mapang fire extinguisher balala amshiba yimya ASI Menose Zashümo sayu; first aid aser tekümzükba yimya ASI Tejongol Sophie-i sayu, süngzü aser lines amshiyim ASI Hairam-i sayu aser apu aser live demonstration, SI Sevi Kera-i sayua liasü.
SI Thepfukranyu-i tepela anküp o jembiba mapang iba sentong nung department balala nungi arua adenertem dang pelaba lemsatepa liasü, ta Kohima DPRO sangdong ka ajanga metetdaktsü.