Ato kilonser-i dang sensak tia nungi anitettsü: Rajnath Singh

Amta (West Bengal), April 18 (Agencies): Tanü Union Minister, Rajnath Singh-i, linük nungi Congress agienba anogo nungi India nung sensak tia malitsü, ta ashi.
Tesüiba mapang Ato kilonser ana- Indira Gandhi aser Rajiv Gandhi na den Congress Tir, Rahul Gandhi tetshia Singh-i, parnok ajaki linük nungi sensak tia agientsü aser sensakertem jenjang ajungkettsütsü atema jembi, ajisüaka Ato kilonser kati dang takok ngua inyaktet, aser paji Narendra Modi lir, ta ashi.
Tanü West Bengal nung Howrah district kübok Uluberia nung election nüboyim sentong ka nung jembidang Home Minister Singh-i, “Parnok ajaki sensakertem kümzüktsü aser sensak tia agientsü atema jembi, ajisüaka sensak tia maneni inna liasü. Tang Rahul-ia ibaji nangzüker. Sensak tia agientsütettsüsa aliba Ato kilonserji Modi dang lir,” ta ashi.
“Koba anogo nung Congress agiendir iba anogo nungjagi India nung sensak tia malitsü ta ni shiteter. Ibayongji ni nenok dang tetsübu kecha makai BJP nem vote agütsütsü atema mepishir,” ta pai ashi.
West Bengal nung Mamata Banerjee-i aniba sorkari yimtenren nung rara adokdaktsüba atema aija Bharatiya Janata Party (BJP) lenir, Singh-i, tang state sorkar yimsüsüba kübok Bengal nung democracy mali, ta ashi.
“Bengal nung Democracy anenogo. Left sorkar yimsüsüba mapang nung yimtenren tsütsü rara kanga liasü, aser tang Trinamool Congress sorkar yimsüsüba mapang nunga kasa rara lir,” ta pai ashi.
Election Commission tenüng sanga pai, Bengal nung election junga agitettsü atema security sepai peria yoktsü ta EC-i nangzükogo, ta ashi.
Pai ashiba agi, April 11 nü Lok Sabha constituency ana- Cooch Behar aser Alipurduar nung agiba election nung BJP-i menden anaprong nung takok angutsü temaitsü nguogo, ibayongji Trinamool Congress lenirtemi tan election nung tamakok angutsü ta meteta nüburtem dang sepaitem meindoktsü akhanger, ta ashi.