Nagaland nung Home Guards & Civil Defence Jawan-tem tia ya koda?

~  Jubangsang, Mokokchung Town.

Osang ajanga angazükba agi, Nagaland dak alaka tanga state nungbo Home Guards aser Civil Defence ana ya department balala. Saka Nagaland nungbo 1990’s tatemlen nungi HG & CD ya külem sür aor ta angazüker. Nagaland nung HG ya 1988 nung tenzük saka CD yabo department balaka makai dang aru. HG yabo State Government aser Central Government na yaritepa 50/50 lemsar iba yimya nung aor saka CD yabo noklang nung noklang Central-i dang mejameja repranger (purely central subject ka lir).
Tatsüba agi, asen kidanger Assam nungbo HG aser CD jawan-tem nem facility tajung den nok o nü tajung amdaktsür aser itasena peria agütsüba angashir. Assam nungbo HG regular battalion ana (2) tashi lir ta angashir saka asenokbo kada mali. Iba den itasena tera dang agütsür. Tanga state nung amato Nagaland nunga HG & CD jawan-temia mapa kasa dang inyaker/service kasa dang agütsür saka facility bo kecha mali aser itasena tangar matoksa kanga agi tajemba agütsür. Pok matur asünungji, jawan-tem okrongba aser temeimtsü tia nung litepba angur.
Ano kaji; tanga state nung ama Nagaland nunga State Disaster Response Force (SDRF) jawan-temi 24/7 (24 hours) service agütsür. Lendong tapu balala atalokba mapang parnok tama tonger alir aser nübur nem mapang shitak nung service tajung agütsür. Angazükba agi, SDRF jawan-tem nem ya HG-i ita nung sen 16,000/- (rupees sixteen thousand only) aser Nagaland State Disaster Management Authority (NSDMA), Home Department-i ita nung sen 4,500/- (rupees four thousand only), ajak senteper itasen ` 20,500 (rupees twenty thousand five hundred only) agütsür. Iba dak alaka tanga facility kecha mali. Tanga state nungbo facility tajung den itasena asenok den kanga agi teimba agütsür, iba denji life insurance dena agütsür saka asen state nungbo life insurance agütsütsübo toktsür itasena apara agütsür.
Tanga state nung ama, asen jawan-temia mapa shitak inyaker aser kasa belema inyaker saka tanga state-tembo tagütsütsü tim agütsüba den külemi itasena aika agütsür. Anungji, asen state government-ia iba nung ya tebilemdangtsü lir masü na! ta bilemer. Ni HG & CD nung inyakera masü aser iba nung ya kecha sentaktepa mali aser nisung kar dak rangloker iba ocet ya züluba masü saka HG&CD jawan-tem temeimtsü tia ngur aria bilem o kar lemsateper dang.