Mitkar Mapa/Khuret – Ezekiel 33:1-9

~ I. Zülu Pongen, Mongsenbai Ward, Mkg.

Ezekiel tapu 33 ajak züngra Tsüngremi ainkar Ezekiel dang mitkar khuret indang shia angutsü. Mitkarji linük kümzüktsü asoshi sepoy telok temulung lemteta ayuba lir. Parnok maparen balala lemsaa lir, item nung jagi sepoy karbor tenishiri jangzü aputsü shimteta lir. Asen Naga nungera lendong osang sangoktsüdang süngkongsa tema aru. Süngkong atemba olaji tapu balala aika lir. Item nung jagi tsükchir arua lir ta sangoktsüba temaitsü süngkong atemba jagi yimtak alir ajaki angateter, aser kümzüktsü renemshia atar. Ibai yimsüsüri anir jangzü apurtem khuret lir.
Yamaji Tsüngrem nisung ainkar nem khuret ka nungloktsübaji parnoki chuba dang metetdaktsür. Khen-khen alima nung takok angutsü tasü aittsü osang sangoktsür, saka khen-khenbo chubai anir nübur ajaki tashi mangaba atema Tsüngrem nungi temerenshi arutsü sangdongba indanga liasü. Jangzü apurtemi züba-zülema toktsüdang lendong aruba ola mesangdongra, mesüra jangzüji mapura tsükchir arua nüburtem tepsetsü aser iba menenji jangzü apurtemi angutsü aser nüburtem züji parnok dang akhangtsü. Saka jangzü apurtemi lendong osang sangoktsür sürnung kümküma renemshia melira parnok tepseta samaba züji jangzü apurtem dak tai mekaotsü, aser Tsüngrem nungi temerenshi mangutsü. Yamaji ainkartemi chuba aser nüburtemi angaka-mangaka Tsüngremer tejembiba mangdang tasü ita sangokja aru.
Tanü tensa nung shiner Tsüngrem mangdang angurtema aika lir, saka ano arogo nung pastor, mungdang tenzüker tatishitsü – ABAM aser NBCC nung tenzükertem ya Tsüngrem o nungbo ainkartem, tanelar lendong tensa mapangren apir political tsütsü yimsüsür ajanga aruba tensaji mita alitsüla aser tasü ita nokdaktsü tim aser nüburtem danga tekümdangtsü sangoktsütsüla. Oda sarasadem onük bendena sarasadem yinzü arogotem dangi yoktsüla.
Tanü tensa Naga nunger sorkar lennirji PDA sorkar nung minister aser MLA tem ya lir. Asenok ajak ajungtsü asoshi India nung koba sorkar lidir idakjisa dena arur asünungji tanüa asenok PDA sorkara NDA den telongjem nung odagi, anungji NDA ya BJP sorkar aser asenok Nagaland-a BJP den longjemer aor asünungji PDA-i NDPP candidate ka yoka election agiogo. Tia maka tan 2019 parliamentary election nung BJP ya adok nungbo NDPP ya BJP ama kümer adokra ya PDA sorkar tai masü, kechiaser political nungbo inyakyim shitak tang lir. Saka tai tulutibaji ABAM aser NBCC–i abentsü. Nüburi kechi metet, saka NBCC aser ABAM nung inyakertem ya tashi temeteter, alima temzüng meteter tesa lir. Saka alima tensa metetsümonga amangbapurtem dang kecha lendong osang magütsü. NBCC aser ABAM nung inyakertemi BJP manifesto ya meteta alinungbo PDA nung minister, MLA temdang ibai angatetdaktsür alitsüba asü sürnung kecha khuret melemsatep südi ta angateter. BJP yagi sorkar aben nungbo Inida nung Secularism samatsü, iba sülenbo tamangertem tali majungtsü, oda tanga sang India nung Laishiba ajak shisaa rongdoktsür aser sentep ki raksaa bentsür, kangki lokzüka indoktsür. India BJP ya RSS tongtiret ka lir, iba nungji meyongnema inyaker, anungji asenok Naga nunger yimsüsür ya khristan tajung ta bilemra Nagaland sorkara iba NDA sorkar den pila tajungba ta bilemer.
Tatem nung Ezekiel 33 nung shia alibaji minister MLA tem dang nungi NBCC aser ABAM tai tuluba asütsü. Nenoki tsükchir-i atsü rakpoka aitba memeteti mitkar mapa nung tamakok aludaktsüogo. Tiakaa third front teloki BJP sorkarji kokra lanlia joko asenoka pei mapa nung saksalema alitsüla ta khuret ka lemsateper.