Lenirtemi ‘Nagaland Khrista asoshi’ tenüng menüktsür: K. Therie

Kohima, April 18 (TYO): Ochimashi politics aser party toktsür tanga ka nung adenba ajanga “Nagaland Khrista atema” tenüng menüktsür, ta tanü NPCC Tir, K Therie-i sangdong ka nung metetdaktsü.
“Council of Minister temi department indang terenlok project fund nungi sen auyabaji tai masü amai bilemer aser maaker. Pei menden nungsa alitsü atema party ka nungi ka toktsüba lenir ka lir. Tai temenen aser ‘Nagaland Khrista atema’ tenüng menüktsübaji pa ajanga lir,” ta sangdong nung shia lir.
“Disqualify sütsüaka mesüra tarutsü nung takoksa angutsüsa süaka, sen magizüki MLAs aser Candidate temi party toktsü ta asüba nungji nüburtemi mamangtettsü. Portfolio agütsütsü ta nangzüka parnok shia nem sen crore 5 agütsüba social media ajanga angur. Parnokisa taila shidi ngua amang. Party toktsürtem ya kanga tamajungba, kechiyong parnoki parnok pusemertem ayoker. Parnok ya nisung jenti shibelenertem lir. Talirtem matsüngdang parnokji tongtibang, kechiyong parnok sülen tanidaker voters lir,” ta sangdong nung shia lir.
“Pei sasa pei ayokertemji tarutsü atema lenmang shibangertem dang masü saka pei tanela aser tamangba yimsü ayokertem lir. Parnok dak tangatetba tajung mesüra taküm nung mangdang mali. Nüburtem atema parnok sentong tajung mali mesüra parnoki tarutsü tia atema mebilemer,” ta paisa ashi.
“Party toktsürtem mesüra voters ashioktsür den amaliteper aser pusemertemia Tsüngrem matsüngdang kasa tiaji ajurutsü,” ta pai ashi.
“Good Friday ajanga menenpur atema Yisu Khrista asüba asenok nem nenshia bilemtetdaktsür. Ni Nagaland nung Khristantem dang Akan taküm yimya mebenshitsü aser tia majurutsü mepishir. Yisu Khrista-i tetsürla dang tai atok, kechiyong lai Pa matsüngdang menen nangzüka temelung meyipa liasü. Akan nem pa tiaji ajurudakjang saka pa den külemi par kiset shirurubo long agi onseta tesüdaktsüma,” ta kasa sangdong nung shia lir.