LS election tanabuba shilem nung voters 66%-i vote agütsü

New Delhi, April 18 (Agencies): Brihostibarnü Lok Sabha election tanabuba shilem nung Union territory ka densema state 11 nung Parliamentary constituency 95 atema election agi, aser vote agütsütsü temsüa alir shilem 66- nisung million 155-i vote agütsüogo, ta Election Commission-i metetdaktsü.
State aika nung election kanga süngjema agiogo, ajisüaka West Bengal aser Chhattisgarh na nungbo mepetmesü adoka liasü, ta Senior Deputy Election Commissioner, Umesh Sinha-i metetdaktsü.
Chhattisgarh nung Maoists telungpurtemi Rajnandgaon nung bomb lendong agütsü aser iba lendong nung sepai ka yiru.
Ano West Bengal kübok North Dinajpur nunga bike nung mejangjaba nisungtemi vote agütsütsü nokdangba ajanga mepetmesü adoka liasü. Raijganj nungbo CPM candidate, Md Salim indang gari raksatsü.
Tanü Lok Sabha election tanabuba shilem agiba state tem ji- Assam, Bihar, Chhattisgarh, Jammu & Kashmir, Karnataka, Maharashtra, Manipur, Odisha, Tamil Nadu, Uttar Pradesh, West Bengal aser Puducherry liasü.
Lok Sabha election tasembuba shilem April 23, 2019 nü state 14 den UT nung Lok Sabha constituency 115 atema agitsü. Assam, Bihar, Chhattisgarh, Jammu & Kashmir, Karnataka, Maharashtra, Odisha, Uttar Pradesh aser West Bengal nunga Lok Sabha menden kar densema lir.
Kasa anogo nungji Gujarat, Kerala, Dadra & Nagar Haveli, Goa & Daman aser Diu nungbo kenüyongi dang election agitsü.
Lok Sabha menden 543 atema shilem tenet küma lemsar election agir aser May 23 nü vote azüngtsü.