Pei temeten, pei khuret

Tanü putu yimsüsübaren ya kin ka nungi jakzükba chuba kati yimsü asür masü, nübortemi yimsü asür. Anungji, yimten yimsüsüba kübok senso shia asoshi yimsüsür shimba mapa nungi tenzüka pei taküm lia aotsübaren ajak nung yimteni temeten agüja lir. Item temetentem rongnung yimsüsür shimtsü tashi agütsüba temeten yasa temaba asütsü. Ibaji kodang bilemdangdir, shitakba nung yimsüsür dang nungibo yimsüsür shimsang aser shimlajisa tuluba aser temaba lir. Senso shiai iba tashiji meteta yimsüsürtemi akümtsübutsüsa alitsübaji kanga tongtibang lir. Tanü asenok tia ajung, yimten nung aseni mulungba yimsüsür shimtsü asoshi asenok tetsür tebur ta mali, senso shia nem temeten agüja lir. Ajisüaka, asenoki tang tashi iba temeten yagi tang aser tarutsü asoshi asen lima yanglur ta süoki ia mebilemer. Iba jagi aikati pei vote ya jenjang makaba oset ka ama mezüngmeshia amshir. Aikati ayoker aser aikati kecha hau ta mali vote enoktsüia maor. Atangji, senso shia nem yimsüsür shimtsü atema temeten agüja aliyonga, yimsüsür kümnerem rongnung kata temulung sülok melira, tezüdangtsüka, shiba nemanga magütsü ratar. Item atemaji shinga nema vote magütsür ( None of the above)  ta asüba nung ajentsütsü yuja lir. Ajisüaka, iba jagi asenoki bilemba nükjidongbo matonger, anungji shinga daka temulung masüyonga, bilemdanger tajunga ka nembosa vote agütsübaji tajungba. Yimten yimsüsürtem shimba maparen nung tezüdangtsü aser teratatsütemji agientsübajia nübortem dak dang keta lir. Tanübo asen lima nung nübortem tenzüktsü asoshi yimten yimsüsür kümnüyonga, election-i aitsüba mapa ya jenjang kanga tasak mapa ka kümogo. Tang yabo yimten yimsüsürtem ya nübortemi shimer masü saka yimten yimsüsür kümnertem rongnung toktepa yimsüsüba menden sen agi alizüker. Yimten nung nübortem nem tashi aser temeten tulu agütsü ser nung kenyongi tashi aser temeten tilakata mali amai akümtsüsa tenzükba tesemji aji asütsü. Yimsüsürtem shimtsü aser agientsü nübortem dak tashi lir saka nübortemi yimsüsür majurutetter. Shitakba agibo, yimsüsürtemi nübortem nüken tsübua bushia arutsüla saka nübortemiang parnokji tsübuseta aser atentena ajurutsü meranger saka ajurutsü memelar. Itemji yimsüsür shimtsü temeten aketba senso memesük, asenok yamaji alir. Iba amaji pei shimtettsüba yimsüsür nem mezüngmeshidaktsüba kuliji election agiba yimya nungi adoker. Asenok parnok dang ayok, anungji asenok ya senso masü saka alar. Ibayongji, pei constituency nungi adokba, pei nisung ajurunüseta azüa mesük aser alar-a mesük ta kidangi meitet, kima kishizüng nung tarensena nokdaka kazür meyipa aor. Ibaji taaktsüka aser tejashitsüka saka asen mapa dak aji langa lir. Aji oda, asenoki asen vote ya senti ta mebilemba agi, vote enoktsüia maor mesüra tangar nem enokdaktsür. Ano,  tesem aika nung senso ajak tenüng nung yimteni dang ajener, ano tesem kar nungbo kibong nung talir temang indang nisung kati dang ajener. Atangji, tangatettep dang lira kibong ajunga indang nisung ka nem ajendaktsüba jagi kinunger ajak nübodoka amongtsü melen mamonger. Kanga tezüba aser mulung lemtetlemtetter. Ajisüaka, linük nung election ozüngi ibaji memelar. Asenokbo ozüngi memelabatemang shitak amai kanga zübazübaa aser mulungsua inyaker. Iba jagi asen lima nung shitakjibo meshitak saka meshitakjiang shitak küma inyaksangshiba maparen aika lir. Yimten nung ya temeten dang masü saka temeten lira yangji senso shia asoshi teinyaktsü khuret lir. Iba khuret abendangji nübodoktsüsa akümtsü, tenla talila agütsütsüsa adoktsü aser nüngsen agitsüsa akümtsü. Asen lima jungnüra, asenok ya temeten dang metetba senso dang masü saka khuret metetba senso kaka asütsüla. Asenoki asen khuret metet nung dang asen temetenjia retreta bilema agitsü. Yimten aser loktiliba nung khuretji tanü indang dang masü saka tarutsü indang dena shisabolua bilema inyakba mapatem asütsü. Temeten o khuret na ya külemi dang aotsü, anungji asenokbo senso ka ama asen lima asoshi tajung inyaktsü khuret benlokdi aser pei temeten amshia asen lima yanglushi tenzükdi.