April ita atema Kohima DPDB senden ayonga menogo

Kohima, April 22 (TYO): April 22, 2019 nü DPDB indang conference hall nung April ita atema Kohima District Planning & Development Board senden menogo, ta ketdangsertem osang ka ajanga metetdaktsü.
Senden nung Deputy Commissioner & Vice Chairman DPDB Kohima, Anoop Khinchi, IAS-i tawa agiba Lok Sabha election takok ngua agitettsüsa züngsem ajaki meranga inyakba aser amalitepba atema pelaba metetdaktsü.
Taoba senden nung lemtetba onüktem reprangshi aser Adoption Committee reports agütsütsü atema tatembangbuba anogoji May 15, 2019 asütsü lemtet. Iba dak sendakba nung ADC Kohima, Lithrongla Tongpi Rutsa (Convenor, Core Committee)-i, iba anogoji süir sülenbo report magizüktsü, ta metetdaktsü.
Societies registration dak sendakba nung Committee Convenor, SDO Shaying Sheu-i, committee-i application kar nungbo metokmeperi angu, anungji itemji agizüktsü atema ano telatetba kar inoksemtsü asoshi Committee-i report ji DPO nem agütsü, ta metetdaktsü.
Iba dak sendakba nung DC-i tali bendenlokba telatetbaji Registration Act den apet asü masü ibaji reprangshitsüla, ta shia maneni kasa onükji taruba senden nung jembitsü lemtet.
Senden nungsa DIC Kohima General Manager, A.Temjen Jamir-i par department-i inyaka aruba osangtem aser 2019 küm teinyaktsü sentongtem metetdaktsü.
Paisa State Incentive Schemes aser North East Industrial Development Scheme (NEIDS) kübok department-i inyakba scheme balala metetdaktsü.
General Manager-isa DIC Kohima-i Viswema nung bee keeping farm, Rural Artisan Program (RAP) kübok stenography training, Prime Minister Employment Generation Program (PMEGP) aser R. Soma Handicraft Cluster-CFC indang mapatongtem metetdakja liasü.