Sri Lanka-i Islamist telok ka dak tai tongloktsür

Colombo, April 22 (Agencies): Deobarnü nisung 300 jungnüa tepsetbaji National Thowheeth Jama’ath (NTJ) ta ser Islamist telok kati inyak ama bilemer ta Sri Lanka sorkar atema otongdar Rajitha Senaratne-i ashi.
Senaratne ya cabinet minister ka lir aser pai ashiba agi, iba telok ya “international support” liasü asü ta asüba bushisüngdang sürar.
NTJ-i tenlaki aser Indian high commission amaktsü atema tasa atonger ta “foreign intelligence agency” kati osang sangoktsü ta April 11 nü Sri Lanka nung police ketdangseri kümdangtsü osang ka metetdakja liasü.
Yashi lendong atalokba dak sendakba nung police-i nisung 24 tashi pua lir aser parnok ajak National Thowheeth Jama’ath (NTJ) züngsemtem lir ta osang ajanga ashir.
Hombar ayaterm nungi Sri Lanka sorkari ‘nationwide emergency’ alitsü sangoktsütsü.
“Sorkari kiralongraba inyaksangshi noktangtsü atema iba telemtetba agi aser taonung ayaterm osang metetdaktsütsü” ta Sri Lankan President Maithripala Sirisena indang media unit-i ashi.
Sorkarisa aonung curfew alitsü ozüng agütsüogo. Tanü tashi nung tasür ajak agi nisung 290 liasü.