Naga yimjung maparen nung Manipur adentsüla: Congress

New Delhi, April 22 (Agencies): Lieutenant General DS Hooda-i Congress party atema zülutsüba ‘National Security Strategy’ document nung Naga yimten tebilemtsü tekaratiba nung latettsü atema shia lir saka iba maparen nung Manipur adentsüla ta shisema lir.
Congress lennirtemi sayaba document nung “Naga telungpur khuret koktetba ajanga region ajungalen tensa tajungba akümtsü” ta shia lir.
“Ajisüaka, iba khuret ya Nagaland nung aliba teloktem den jembiba agi mekoktettsü. Tenangzükba agiba ajanga kidanger state tem aser talisa Manipur nung kongshitsü. Anungji Naga khuret koktettsü atema mapa inyakba nung Manipur dendaktsütsüla” ta document nungsa shia lir.
Saka document nungji Naga yimjung maparen nung Manipur nung state sorkar mesüra telungpur teloktem shirnok adentsülar shia mali.
Northeast ajungalen ozüng alema aruba khuret lir saka iba khuret atema kanga dang shisa kaa aser jungjunga bilemdanger ang inyaktsüla, ta ‘National Security Strategy’ document nungsa shia lir.
Northeast nung state shia indang tebilemtsü balala lir saka kasa tangatetba ka alibaji terenlok maliba, linük nungi balaka bendanga amshiba aser senzüka yutsüba lir. Iba ajanga kintemi pei maitsü kümzüka ayutsü meranger aser parnok tsüngda obang meputep adoker. Telungpur anema mapa talangka inyaka aruba ajanga telok aikati ozüng alema inyakba anenogo mesüra sorkar den ceasefire tenangzüktep agia lir, ta document nungsa shia lir.
Ajisüaka, iba ajanga northeast nung yimjung bener maru lir. NSCN (IM) ama teloktemi prangpong amba züngsemtem yua lir aser Nagaland nung sorkar ka kümteta lir. Meitei telungpur teloktemi parnok prangpong amba züngsemtem Myanmar nung yua lir aser arrtsü tashimaitba ajanga parnoki Manipur-i aruli-oli ta zübazüba senzür, ta Congress document nung lir.
Northeast nung terenlok mapa inyakba, kin shia indang angatetba aser ka küma longjemba ajanga tebilemtsütem koktettsü, ta parnokisa ashi.
“Asenoki mezüng Siliguri Corridor dak tenük yoktsüla. Nepal aser Bhutan nungi melamela senzüsenbongba aser Bangladesh nungi ozüng alema aruba ajanga northeast nung timtem bentsür arutsü. Siliguri Corridor akangshiba ajanga Gorkhaland khuret koktettsü. Gorkhaland tebilemtsü ya national security tsütsü nungi repranga inyaktsü nüngdaker” ta parnokisa metetdaktsü.