Manipur nungi tanur kati UN nung o jembitsü

Guwahati, April 23 (Agencies): Manipur nungi arishi küm 7 tain Licypriya Kangujam-i United Nations (UN) nung o jembitsü.
Global Platform for Disaster Risks Reduction 2019 indang Session 6 buba nung lai onük ka jembitsü.
Iba sentong ya May 13-17, 2019 tashi UN Headquarter, Geneva, Switzerland nung alitsü.
Licypriya ya Class 2 nung azünger aser UN Office for Disaster Risk Reduction aser Government of Switzerland-i shilem agitsü jaoker rongnung la ya tanutsütila lir.
Licypriya ya tang International Youth Committee (IYC) nung Child Disaster Risks Reduction Advocate ka ama inyaker.
UN nung lai Asia aser Pacific nungi tila tanurtem aser lanurtem tenüng nung jembitsü.
Iba sentong nung linük 140 nungi nisungtemi shilem agitsü aser government, non-government, National Societies of Red Cross, Academia, Children aser youth organisations nungi teshimtet nübo 3000 dak tema adentsü.
“Television nung ni nisungtem menoknok, tzümetsüng aser tsunami ajanga tim atemba aser asüba angudang ni kanga tsübur. Tanurtemi pei tsüraburtem akoksaba mesüra lendong balala ajanga nisungtem talidak makaba angudang ni ajeber. Nisung ajak longjemer asenok ajak atema alima tajungba akümtsü merangang ta ni ayongzüker” ta Licypriya-i osangbener den jembidang ashi.