West Bengal nung TMC-i Congress züngsem ka lepset

Murshidabad, April 23 (Agencies): West Bengal kübok Murshidabad Lok Sabha constituency nung Congress züngsem ka lepset ta police-i ashi.
Iba tatalokba nung nisung ana yirua lir aser Congress-i Trinamool Congress dak tai tongloktsür.
“Murshidabad nung election dak sendakba lendong atalokdang nisung ka asü. Paji arishi küm 52 tain Tiyarul Sheikh ta jangjaogo” ta ADG (Law and Order) Siddihathnath Gupta-i ashi.
Sheikh ji Baligram Primary School nung vote enoktsütsü atema aodang nisung telok ka den raratep aser idangji parnoki pa dak teka sangshi ta police-i ashi.
Pa mozü kidangi anir ao saka süadoker liasü. Iba lendong nung nisung ana kanga mejungi yirur Lalbagh Hospital nung anepaludar. Tenaji Congress züngsem Mehboob Sheikh aser TMC züngsem Tahijul Sheikh na lir, ta parnokisa shisem.
“Tiyarul ji ozü party züngsem liasü. Pa vote enoktsüi aodang TMC züngsemtemi pa tepset” ta Murshidabad Lok Sabha menden nungi Congress candidate Abu Hena-i ashi.
Pa booth tonga aodang TMC züngsemtemi tim masüba mapa inyakba angu aser idangji parnok tsüngda mangatettep adokdang pa dak teka sangshi, ta Hena-isa shisem.
Congress-i iba tatalokba ya Election Commission dang sangoktsüogo. Ajisüaka, TMC-i parnok dak tai tongloktsüba magizüker aser Congress züngsemtem sasep nung raradang iba lendong atalok ta ashir.
“Election mapang nisung taküm samaba atema kanga sasar. Ni iba dak sendakba osang tejangja mangazük lir. Congress sasep nung obang meputep adoka raradang iba ya atalok sütsü akok” ta Murshidabad nungi TMC candidate Abu Taher Khan-i ashi.
Election Commission-ia Murshidabad district magistrate dang nungi iba tatalokba indang osang tejangja meshiogo.