Manmohan aser kinungtsü nati Guwahati nung vote enoktsü

Mongulbarnü taoba Prime Minister Manmohan Singh den pa kinungtsü Gursharan Kaur nati Dispur Government Higher Secondary School nung vote enoktsür kimai aludang agiba noksa angur. (Guwahati, April 23)

Guwahati, April 23 (Agencies): Taoba Prime Minister Manmohan Singh aser pa kinungtsü Gurcharan Kaur nati Mongulbarnü Assam kübok Guwahati Lok Sabha constituency nung vote enoktsüogo.
Taoba PM aser pa kinungtsü nati Dispur Government Higher Secondary School nung vote enoktsü.
Tena tanü vote enoktsütsü atema New Delhi nungi aru aser tanü nikongtsütsü meyipa aotsü.
Manmohan ya Hemoprava Saikia’er kidang taa agüja alir. Saikia ya taoba minister aser Assam CM Hiteswar Saikia kinungtsü lir.
1991 küm Manmohan-i Union finance minister akümba sülen taoba Assam chief minister Hiteswar Saikia pa nem Assam nungi Rajya Sabha menden nung agütsütsü nangzük.
Iba sülen Sarumotoria nung par kidang lidaktsü.
Tanü Manmohan aser kinungtsü nati vote enoktsüba sülen Congress Guwahati candidate Bobbeeta Sharma, state Congress president Ripun Bora aser Leader of Opposition Debabrata Saikia nungertemi tena pelaa agizük.
Manmohan ta 1991 nungi tang tashi Rajya Sabha züngsem ka lir aser tan kümsük ya June 14 nü tembangtsü.
2009 aser 2014 General Election aser 2016 state Assembly election densema Manmohan-i taoba mapang election aika nung vote enoktsüogo.