Kohima nung DDMA senden agiogo

Kohima, Rongchii/April 23 (TYO): DPDB Hall nung April 22, 2019 Hombarnü Deputy Commissioner Kohima, Anoop Khinchi IAS-i anir Kohima District Disaster Management Authority (DDMA) quarterly senden takok ngua agiogo, ta DPRO sangdong ajanga metetdaktsü.
Iba senden nung tongtibang onüktem indang olemtep agidang, koba District Disaster Management Plan (DDMP) onüktem update asütsü atema liasü, iba mapang DC-i, iba Plan nung bendenloktsü atema tebilembatem ashitsü atema züngsemtem dang tayongzükba agütsü.
April 16, 2019 nü State Level senden nung State Chief Secretary-i tuyuba ama May 4, 2019 anogo nübudok mapa alitsü aser iba anogo nung onüktem bener arutsü asoshi sentaktepa alirtem den külemi DDMA züngsemtemi tebilembatem lemsateptsü atema DC-i metedakja liasü.
District Disaster Management Plan nung ajemdaker, District Project Associate, Victor Yhome-i kaket nung aliba nükjidongtem indang jembia liasü, kong okila, district profile aser line Departments indang teinyaktsütem densema chapter pungo keta lir.
Iba kaket NSDMA ket tongtsütsü aser agizükdaktsütsü atema kaket nung agüja alibatem züngdanga aser tim temotongshitsütem agia bendenloksemtsü asoshi züngsemtem dang Yhome-i mepishia liasü.
Tzüngluruwa mongpu süiba sülena jana bendenba tesem nung mi apuba aser mokozü alongba reprangshimtsü asoshi Administrator KMC ajanga sangdongba sülen ADC aser DDMA CEO, Lithrongla Tongpi Rutsa-i anir DDMA team-i KMC dumping site semdanga liasü, ta District Disaster Management Officer, Thejangulie Zao-i metetdaktsü.
Team-i iba tesem semdang aser ana meta aliba arem tem nung merokmi agi kongshitsü aliba tesem asadanga, mi lendong nokdangtsü atema teyari meshia District Disaster Management Officer, Thejangulie Zao dangi tezüluba nung agütsü.
Maneni, kasa senden nungsa tzüngluruwa matong tsüngda emergency maparen mashi atema pei pei wadang nung renema alitsü asoshi line Department talisa Power, Food and Civil Supply, Medical, PHE, Motor vehicles, Forest aser KMC tem dang ashi, kong line Department-i parnok renema aliba indang lemsatep.