Kohima, Dimapur & Wokha tesayurtem atema IT workshop tenzük

Kohima, April 23(TYO): Kohima, Dimapur aser Wokha district tem nungi computer/IT tesayurtem atema angati Information Technology (IT) workshop ka tanü nungi tenzükogo.
Tanü Dr. Neilhouzhii Kire Government Higher Secondary School, Seikhazou nung Governor P. B. Acharya, Rural Development Advisor Dr. Neikiesalie Nicky Kire aser tanga tongti nisungtem lia School Education Advisor K T Sukhalu-i iba sentong tenzüktsü.
Mumbai nunga amenoka aliba NGO-Indian National Fellowship Centre (INFC)-i iba workshop ya agir aser iba ya Nagaland aser Maharashtra tsüngda school linkage programme nung shilem ka lir.
Iba workshop ajanga school curriculum nung multimedia amshitsü atema tesayuba agütsütsü.
Workshop nungsa kaketshirtem dang Scratch sayutsü. Iba ya Massachusetts Institute of Technology-i adokba programming language ka lir.
Computer indang workshop ji Upnagar Shikshan Mandal (USM) Shriram Mantri Vidyanidhi Info Tech Academy ajanga agitsü aser shisalen sayurtemji- Nidhi Poddar, Trupti Jadhav aser Snehal Sambre nungertem lir.
Kasa workshop ya Dimapur aser Wokha nunga ayonga agitsü.
Lokti mesüra linük ka tejakleni aotsü atema shisaluyimba ya kanga tongtipang lir ta tanü Governor Acharya-i o jembidang ashi.
“Technology ya asenok yaritsü atema purapitetba lir. IT ajanga qualitative education agütsütsü aser technology education ajanga lanur kaketshirtemi asen state tejakleni anir aotsü” ta Advisor Sukhalu-ia ashi.
Sentong nung INFC Mumbai nungi Nidhi Poddar-ia o jembidang “technology ajanga nisungtem sendakteper aser north east nung technology tajungba kümdaktsütsübaji kanga tongtipang” ta ashi.
INFC nem Nagaland nung people connect programme inyakdaktsüba atema Nagaland governor dang kanga pelar, ta laisa metetdaktsü.
Sentong nung mendenji School Education & SCERT Principal Secretary, Menukhol John liasü aser Dr. Neilhouzhii Kire GHSS principal Dr. Bijano Murry-i anküp tepela o jembi.