Border Peace Coordination Committee rongdak senden ka amen

BPCC (A-N) Working President, Jiten Buragohain-i jembiba noksa nung angur.

Dimapur, April 24 (TYO): Tanü Mariani (Assam) nung Border Peace Coordination Committee (A-N) rongdak senden ka ayongzüka amen, ta osang ka ajanga metetdaktsü.
BPCC (A-N) Coordinator’er kidang amenba senden nung züngsemtemi minute ka mokremer April 17 nü asüsang BPCC(A-N) President, asür, Bhawa Prasad Bora (B.P. Bora ta ajasang) nem akhüm agüja liasü, iba sülen Assam Valley Baptist Mission Evangelist, Huni Gogoi-i sarasadem.
Asür nem akhüm agütsüba sülen züngsemtemi working president ka shimtsü atema o lemtepa liasü.
Tang BPCC (A-N) nung executive züngsem, Jiten Buragohain Working President shimtsü atema Pulin Handique-i tenüng benok, iba sülen N. Likok Pongen-ia ibaji junger, ta agizüka liasü.
Senden nung züngsemtemisa Assam nungi President shimtsü lemtet. Assam nungi züngsemtemi tekaratiba nung tetemsü nübo ka shimtsü atema mapa nungloktsü.
Züngsemtemisa asür, BP Bora den April 27 nü tatembangbuba sentong nung adentsü aser mangyimer kibongi aginüba ama asür nüngtem nung Souvenir ka taruba Honibarnü Vice President, BPCC(A-N)-i sayatsütsü lemtet.
Tanü amenba senden ya Vice President BPCC (A-N) Imsu Jamir leniba nung agi aser tang tasen shimba working president, Jiten Buragohain-i tepela anküp o jembia liasü.