DWT aser ASTD-i khukhua aitsür

Dimapur, April 24 (TYO): Dimapur Watsu Telongjem (OWT) aser Ao Senso Telongjem Dimapur (ASTD)-i sangdong balala ajanga Wt. Toshinaro tepsettsü merangba aser auyaba tatalokba khukhua aitsüba metetdaktsü.
Wt. Toshinaro ya Longjang nunger asür Rev Ayutemjen’er jala lir aser April 17, 2019 nü Aoyimkum Dimapur nung alir Imtisungchet-i la tepsettsü merang. Pa ya Mahesh Mech aser Mrs. Sashitsungla (Changki) na jabaso lir.
Wt. Toshinaro-i kanga dang tasü itta, la tepsettsü meranger den raraba atema tetushi agütsür. Maneni Dimapur women police-ia mapang shitak nung bushisüngdanga aibelener apuba atema tenüngsang agütsür, ta DWT President, Wt. Yarsangla aser Secretary Wt.Aoinla Jamir nati ashi.
Ozüng amertemi Imtisungchet ji bail nung mechioktsüla saka tarutsü nung iba ama lendong majurutsü atema ozüng tapet agi merenshitsüla. Talisa kija mesüra telok shingaia aibelener bail nung anizüktsü memerangtsüla, ta Dimapur Watsu Telongjem-isa metetdaktsü.
ASTD President I. Wati Jamir aser Secretary K, Mar Lemtur nati sangdong ka nung Imtisungchet khukhua aitsüba metetdaktsü.
Dimapur Women Police aser tanga ozüng amertemi tekaratiba nung aibelener nisung apuba atema ASTD-i pelaba metetdaktsü aser takoksa ajurur nem temeten agütsütsü aser ozüng tesashi kübok aibelener merenshitsü atema ayongzük.