BJP Nagaland-i Dy CM posemer; BJP scarf agiba atema tatok meshir

Kohima, April 24 (TYO): Nagaland State BJP-i Legislature Party (BLP) Leader aser Deputy Chief Minister Y Patton posema nungiter saka pai polling station ka telungi BJP stole agir aiba atema tatok meshir ta metetdaktsü.
37-Tyui Assembly Constituency kübok Riphyim Old-III nung Y Patton-i voters slip aika bener Polling Station-31 telungi aiba indang video ka social media nung kanga prokshia liasü.
Tanü BJP President aser Higher and Technical Education Minister Temjen Imna Along-i iba video indang jembidang BLP leader Patton-i vote 8-9 ka enoktsü ta asübaji khenyongi tiyazü lir ta ashi.
Osang tejangja memeteti olulu meproktsüla ta Nagaland State Congress-i Deputy CM Patton dang menden tokjang ta akhangba atema Imna Along-i ashi.
“Ozü lenniri pa indang vote dang enoktsü ta onoki osang tejangja nguogo” ta paisa ashi.
Polling station nung Returning Officer aser Observers-i BLP leader metentsüogo anungji video ji jungjunga jangjatsüla. Pai vote 8-9 enoktsü ta asüba kuli kecha mali anungji onoki pa posema nungiter, ta Nagaland State BJP president-isa metetdaktsü.
Deputy CM aser polling station nung ketdangsertem tenüng menüktsütsü atema iba video ya yanglur prokshir, ta paisa ashi.
Video nung Patton-i voters slip aika abenba aser presiding officer indang record book nung signature 7 tashi asüba atema osangbeneri asüngdangdang Imna Along-i video ji mangu ama langzü.
Polling ketdangsertemi Patton metentsüogo anungji parnoki ang pai vote aika enoktsü asü masü’ar kuli agütsütsü, ta paisa shisem.
Election Commission-i video nung ajemdaker iba polling station nung re-poll asütsü tetuyuba agütsü. Anungji, observers-i re-poll mapang kanga junga reprangtsü ayongzüker, ta Imna Along-isa ashi.
“April 11 nü Y Patton-i Polling Station telungi BJP scarf agir aibaji tebilemba tamajung kecha maliasü. Iba election nung BJP candidate mali saka PDA consensus candidate ka dang liasü. Y Patton ya BLP leader lir aser iba jagi pai scarf ji agiba dang lir.
Iba ya ECI tetuyuba mesüra Election Code of Conduct alema inyakba mapa ka masü saka iba ajanga nisung kar dang temulung yirutsür lira, onoki tatok meshir” ta BJP President-isa ashi.
Linük nung Citizenship Amendment Bill aser uniform civil code yanglutsüba tebilemba atema pai olen ka jembidang “Tang lateta aliba CAB ya onoki magizüker” ta ashi.
State shia nung tebilemtsü balala lir aser Naga nunger nem Constitution of India ajanga tashi agüja lir, ta Along-isa ashi.
Ozüng ka meyngludang tamasa yimjak nung benoka jembir anungji iba ajanga telok tilatem kümzüka ayutsü. BJP Nagaland-i telok tilatem tenüng nung national BJP lennirtem den ajuruteptsü, ta paisa shisem.