Cadre officer 18 den NSS tepila sentong agi

Dimapur, Rongchii/April 25 (TYO): Nagaland Secretariat Service (NSS) cadre, Secretary asem aser cadre member officer 15 den Secretariat conference hall, Kohima nung April 24, 2019 nü tepila sentong agiogo.
Officer tem ka dak alaker parnok ajak mapa nung küm 35 abensaba sülen mapa nungi anenogo. Officer tem timba ka iba ita tatemi mapa toktsütsü aser parnok rongnung kar ita ishika inyaktsü aser parnok mapa tulubai ajungkettsütsü akok kechiyong parnok mapa ajungkettsütsüba maparen bangdaka lir.
Mapa nungi anenertem tenüng nung jembiba mapang Veterinary & AH, Secretary-i la aser la den külemi mapa nungi anener, NSS 1984 batch, nem tulsang Tüngremi küm 35 tashi temang nung timtem kecha melei inyaktsü sa temoatsü agütsüba atema pelaba lemsatep.
Parnok atema tepila sentong ayongzüktsüba atema Secretary-i NSSA dang pelaba lemsatep. Laisa, cadre züngsem tenet tashi mapa temabi atutsü atema NSSA-i süoki ia agiba aser P&AR Department-i mapang shidak nung maparen achaayanga inyakba atema pelaba lemsatep. Parnok rongnung asem Secretary mendeni atu aser par pezü Additional Secretary mendeni 2019 March ita ajungketogo, koba lai ashiba agi, parnok pension benefits atema tajangzük tulu asütsü.
Küm 35 tashi sorkar tenzüker ka ama lai junior officers tem ajungshia liasü. “Anogo shia mapai arua pei nem lemzüktsüba mapa ochishia aser nendak nendaka inyakba dang nungi temulung süa bilemba kecha nunga mali,” ta lai ashi.
Laisa, nisung ka career nung jenjang ajak ya kanga tongtibang lir, kechiyong jenjang ajak nung tangazükba balala alir aser iba ajanga khuret tuluba abentsü asoshi pa/la sempet arangshitsür. Mapa teti asoshi ta jangjar aliba ajanga nisung karibo angazüktsü asoshi temulung magütsür ibayongji parnok temaba jenjang atongdang mapa makok akümer, ta shi lai junior tem dang jenjang aketba ketdangser kaka akümtsü ajungshi.
Lai ashiba agi, Civil Secretariat ya inyakyim, temzüng ozüng aser tashi ajak atsüngdena aliba tesem ka lir aser NSS ya tangar dang nungi tekübokba masü anungji officer temi NSS nung züngoksemba atema nemadanga bilemtsüla.
Maneni lai, NSS züngsem ka ama Nagaland sorkar tenzüktsü asoshi maongka anguba ya tetushi ulura ta ashiba den NSS maneni temaba jenjangi anir atutsü ajungshi.
Joint Secretary, Amenla Sashi shibai NSS züngsemtem tenüng nung jembia liasü, lai mapa toktsür aoba ketdangsertem tenüng asangba den parnok tarurtsü tajungba asoshi imlatsüba lemsatep. Laisa, parnok mapa tajung asoshi parnok tenüng sanga liasü.
Mapa toktsür aoba ketdangsertem nem memento aser pelaba temaitsü kuli kaket tajung yanglur agütsü.
Officer tem den tepila sentong ya NSSA tatong tir Kito Swu lenisüba kübok aka aser NSSA tir Johnny Humtsoe-i lokti pelaa agizükba o jembia liasü. Sentong nungsa 1993 batch tetsür telok kati ken tajung ka tena liasü, ta ketdangser sangdong ka ajanga metetdaktsü.