Sri Lanka bomb lendong dak sendakba nung ano nisung ka puogo

Colombo, April 25 (Agencies): Easter Sunday anogo nung kiralongrartemi bomb aika amshia Sri Lanka nung Tenla ki aser hotels amakba lendong nung nisung 350 dak tema asüba sülen shishilembartem aser tamangba yimsü lenirtemi ano lendong agütsütsü südi, ta shisabulua aliba mapang ka nung bomb lendong agütsüba nung melung malemer ana tebu puogo, ta tanü Sri Lanka Ato kilonser, Ranil Wickremesinghe-i metetdaktsü.
Shishilembar, Mohamed Yusuf Ibrahim’er jabaso ana- Ilham Ahmed Ibrahim aser Imsath Ahmed Ibrahim nati April 21 nü Shangri-La aser Cinnamon Grand hotel na nung bomb pokdaktsü südi, ta melung malemer. Pai par jabaso ana ajungshia aser yarisema alitsüa akok, ta melung melemi tanü police-i pa puogo.
Jabaso ana rongnung tambusang, Ilham-i Cinnamon Grand Hotel nung bomb pokdaktsü; tamalena police-i pa pua liasü saka tesülen chiok, ta Sri Lanka sorkar ketdangser kati metetdaktsü.
Taküm bendanga agüja pei mang nung bomb alenloker pokdaktsür nisung teku rongnung nisung tibo jangjaogo, aser nisung tekububaji bomb pokdaktsür rongnung ka kinüngtsü asütsüa akok, ta kasa osang ajanga metetdaktsü.
Catholic Arogo asem aser hotel asem nung bomb pokdaktsübaji Islamist telok National Tawheed Jamath (NTJ)-i lir, ta Sri Lanka sorkari sangdongogo. Islamic State-i parnok sasa parnoki iba lendong agütsü, ta sangdong, ajisüaka sorkaribo NTJ nem tai tongloktsür.