Myanmar toktsür ajentsü mer-angba atema ULFA-I züngsem 3 tepset

Guwahati, April 26 (Agencies): Paresh Baruah-i aniba ULFA-I teloki par züngsem asem Myanmar nung tepset ta osang ajanga ashir.
Par asem jagi miima Myanmar toktsür jena aotsü aser security forces tsüngdang temai adoktsü sentong atongba atema tepset.
ULFA (I) züngsemtemji-Lalit Asom, Ashwini Asom aser Rhino Asom (Rubul Moran) nungertem liasü aser parnoki Myanmar kübok Taga nung aliba tesep ka nungi jena aotsü merangba atema tepset.
Sepaitemi apuba ULFA (I) züngsem Mridul Mahanta (Nibir Asom) dang asüngdangya asüdang iba osang angazük.
Taoba Bodbarnü Mridul ya Arunachal Pradesh nung Army aser police külem telok kati apu.
“Anogo 20 tejakdang Myanmar lushi nung ULFA (I) züngsem asemji par commander-i tepset. Myanmarese Army-i Sagaing region nung telungpurtem anema mapa inyakba nungi ajentsü atema par asemi Taga toktsür aotsü sentong atong” ta intelligence ketdangser kati ashi.
“Par asemi international border adentsü aser iba sülen security forces tsüngdang temai adoktsüba sentong renema liasü. Saka Myanmar kübok Niliguri Gut camp area nung Golap Sonowal (Golab Asom)-i parnok apu. Golap ya Niliguri Gut camp nung ULFA (I) indang commander lir” ta ketdangserisa ashi.
ULFA (I) indang okadaki par asemi aibelenba putet aser ULFA (I) tanishir Paresh Baruah dang nungi temelaba meshiba sülen capital punishment agütsü, ta ketdangserisa shisem.