Mahanta’er teloki Amit Shah anema onük benoktsü

Guwahati, April 26 (Agencies): Taoba Assam chief minister Prafulla Kumar Mahanta-i aniba Asom Andolan Sangrami Mancha (AASM)-i okadak BJP president Amit Shah anema ken o ka benoktsü telemtetba agiogo.
Assam nung National Register of Citizens (NRC) mapa inyakba atema Supreme Court nung ken o benoka angadangba mapang Amit Shah-i iba onük jembiba anema parnoki ken o ji benoktsü.
Taruba anogo 10 tsüngda Supreme Court nung onoki ken o ka benoktsü, ta Hokolbarnü Mahanta-i Guwahati nung osangbener dang ashi.
“Tawa BJP national president Amit Shah-i West Bengal nung lokti sentong kar nung Parliament nung Citizenship (Amendment) Bill 2016 magizük tashi NRC mapa anena atatsü ta jembi. Supreme Court-i NRC mapa tembangtsü atema Assam nung ketdangsertem dang July 31 anogo latetja lir, anungji kodaser pai ibaji shiteter?” ta Mahanta-i asüngdang.
Iba onük atema AASM-i senior advocate Dilip Choudhury teyari agidar, ta paisa shisem.
West Bengal nung election atema nüboyimba sentongtem nung BJP President-i mezüng Citizenship (Amendment) Bill yanglutsü aser iba ajanga refugee ajak nem senso agütsütsü aser iba sülen jiang NRC mapa inyaktsü ta shia liasü.
“Iba ya Supreme Court-i mapa inyakba mezüngmeshiba lir. SC-i NRC update maparen ketdangsüa repranger aser iba mapa tembangtsü atema July 31 latetja lir, anungji kodaser yamai jembir?” ta advocate Dilip Choudhury-ia ashi.
“Iba ya ozüng alema inyakba mapa ka lir aser onoki SC nung Shah anema ken o benoker bushisüngdang asütsü atema mepishitsü. Onoki anogo 10 tsüngda Shah anema petition ka benoktsü” ta paisa metetdaktsü.