Nyay scheme ya sensak anema surgical strike lir: Rahul Gandhi

Samastipur (Bihar), April 26 (Agencies): Tanü Congress Party Tir, Rahul Gandhi-i, Nyay scheme ya sensak tia anema surgical strike ka lir, ta metetdaktsü.
Iba scheme atema itasen agir middle class purtem dang nungi sentsüa mesükzüktsüa akok, ta tsübua bilemba dak sendakba nung Rahul Gandhi-i, iba scheme atema senotsüji Narendra Modi ajanga tajangzük ngudaktsüsang, Anil Ambani nunger ama auertem dang nungi mesükzüktsü, ta ashi.
Centre nung NDA sorkar aija Gandhi-i, ‘Kuchh nahin sab jhootha hai Narendra Modi ne loota hai’, (Tenangzükba ajak tiyazü ta kuli nguogo. Narendra Modi-i nüburtem ket nung aliba ajak auyaogo), ta ashi.
North Bihar kübok Samastipur jila nung RJD lenir Tejashwi Yadav den külemi sabang ka nungi jembidang Gandhi-i, sorkari Lalu Prasad mezüngmeshiba atema aitsü aser tan election nung BJP-i aniba teloktepi takoksa angutsü, ta ashi.
Congress lenirisa Ato kilonseri kiralongrartemi Uri aser Pulwama na amakba sülen sepaitemi operations aoba nungi election nung tajangzük angutsü atema jembir, ta aitsü.
“Pai pa onük jembitsü aliba tesem ajaki ‘teleprompter’ bener aoer. Iba nungjagi pa dang yamai tuyur- mapa tebilemtsü atema tejembi, sensaker shia nem parnok account nung sen lakh 15 inoktsütsü atema nai nangzükba indang tejembi. Na menütsütsüa akok. Surgical strikes atema maneni jembiang ta tuyur,” ta Rahul-i ashi.
Congress-i takok ngura sentsüh atema aluyimertem shinga tepoukdaki meyoktsü, ta nangzüka pai, “Nai (Modi) sentsühtsür Nirav Modi aser Vijay Mallya nunger ama linük nungi jena yoktsü yarir, saka onokibo sensakertem, aluyimertem aser working class atema nokdaker. Onoki parnok khuret lemsateptsü,” ta ashi.