Tetsürtem kümzüka alitsü projects atema sen cr. 4,000 lemzüktsü

New Delhi, April 26 (Agencies): Linük nung tetsürtem kümzüka alitsü atema project balala asoshi Centre-i Nirbhaya Fund kübok sen crore 4,000 lemzüktsüogo.
Iba fund kübok, tashiyim amshia raksatsüba aser acid amshia amakba ajanga takoksa angur tetsürtem nem senotsü teyari agütsütsü aser tetsür-tanurtem atema special police units amenoktsü.
Home Ministry osang ka ajanga ashiba agi, iba fund kübok sen timtiba (crore 2,919.55) lemzüktsübaji ‘Safe City Project’ atema lir, aser iba project ya yimti 8- Delhi, Kolkata, Mumbai, Chennai, Hyderabad, Bengaluru, Ahmedabad aser Lucknow nung amenoka inyaker, aser iba ya lokti aliba tesemtem nung tetsürtem nem tekümzükba agütsütsü atema lir.
Ano Central Victim Compensation Fund atema sen crore 200 lemzüktsü. Iba project indang tongtibangtiba nükjidongji tashiyim amshia raksatsüba aser acid amshia amakba ajanga takoksa angurtem, ozüng alema tanurtem anema benshiba aser nisung shibelenba ajanga takoksa angurtem nem senotsü teyari agütsütsü atema lir, ta Ministry osang nung shia lir.
Item projects ajunga ya central sorkar indang ‘Nirbhaya Fund’ kübok inyaker. 2012 küm Delhi nung tebur telok kati tetsür ka tashiyim amshia raksaja tepsetba nüngtem nung iba Fund nüng jaloktsü, ta Home Ministry ketdangser kati metetdaktsü.
Emergency Response Support System (ERSS) atema ministry-i sen crore 321.69 lemzüktsü, aser iba kübok India tesem ajungalen single emergency response number – 112 agütsür. Iba project ya tang state aser Union Territories 20 nung mapa küma inyakdar.
Special Unit for Women And Children (SPUWAC) aser Special Unit for North East Region (SPUNER), Nanakpura, Delhi atema sen crore 23.53 lemzüktsü; SPUWAC aser SPUWAC naprong mapa küma inyakdar.
Ano Chandigarh nung aliba Central Forensic Science Laboratory nung sen crore 99.79 indoka state-of-the-art DNA laboratory amenokdar.
Home Ministry-isa bushisüngdangtsü, ken o akatsü aser medical ketdangsertem training atema sen crore 7.09 lemzüktsüogo. Iba dak alia district aser sub-divisional police station level, Delhi nung social workers atema sen crore 5.7 lemzüktsüogo.