Mitkar khuret o semlok

~ P. Renthy Jamir.

Iba ocet ya Tir Yimyim 19-04-2019 nung I.Zülu Pongeni züluba ngua pa den semloka oren kar zülur. Pai ashiba nung angatetba, PDA Sorkarji BJP telok aser BJP telok ya Khristan yimsü anemertem lir. Ya India lima rangben indang ashir, Naga lima atema dang masü. Aser Nagaland arogo lenir NBCC, ABAM teloki parnok tataba mitkar ka ama ochi kuli yimyim tasü ita mayimteter.
BJP telok ya Hindu temeja shirnoki Khristan yimsü anemer. Akidang Morarji Desai mapang Khristan yimsü anemba, ano BJP Sorkar alidang 24-01-1999 Orissa nung Australian Missionary Graham Steward aser jabaso Philips, Timothy par asem gari nung shibanger rongsetba den Khristanpur reshikangshiba meteta lir. Tang Modi government arur India ajunga Assam tashi arua BJP teloki Khristan aser Muslim dangbo Nashi taoba ta Nashi atemer nisung aika tepseta reshikangshiba angur. Aser Union Minister Mukhtar Abbas Nagvi-i 25-05-2015 nung “Nashi shi achir ajak Pakistan mesüra Arab lima kar bushia oang” ta ayimoktsüogo. Yangji Naga nunger ajak dena lir. Ano Citizenship Amendment Bill (CAB) tetezü bendang lima balala nungi arur ajak Hindu tashibo India senso agüja India limaji Hindu lima akümtsü ariteper.
Modi ya asüküm ulura tiazü jembia tangar atalatsü nung mongin takotet. Pai T.V channeltem aser osang zülur aika alizüka yur pa uluba indang tapu tapu sayua jembidaktsür. Joko tang pa mapang nungbo Election nübuyim nung O tajung kata mejembir tatalatsüba tesempa O dang jembir. Joko aji party ajak yimya. Congress lenir Mani Shankar Aiyar-ibo 07-12-2017 nung Modi Neech aadmi (a vile man) who has no Sabhyata (civility) süko meila nisung ta ashi. Ano NCP lenir Sharad Pawar-ibo 20-04-2019. Modibai kechi mapa tamajung ka inyaktsüar shingaia meteta mali ta ashi. Modi yazü jembibatemji 14-02-2019 Pulwama nung CRPF 45 pokseter 77 yiruba atema India Sepaitemi tayimtsü amshia Pakistan Balakot 26-02-2019 nung bomb tsükdakja terrorist 300 südaktsür aika yirutsü ta Congress teloki kechi sütet onok BJP government-i Pakistan kokogo ta ayimten meso. Saka Pakistan nunger Major General Asif Ghafoori ashiba agi par lima nung meja kata masü, ki jara kecha nunga Ita lung (brick) ka nunga tarak mali ta khuli asü. Pakistan nunger-ibo India meyong Air Mig 21 ka kazüka tanishisang Abhinandhan Varthaman taküm apu. Tang Election nübuyim pamphlet nung Modiba o Varthaman na noksa külemi Nagaland Assembly Election nung Rioba tena külemi yangluba ama to yanglur India tesem aika nung anepba T.V nung nguogo. Aser Congress teloki kecha mesütetba onok BJP-i Pakistan kokogo ta asükümba ya alima tsüngdang taaktsü mapa tulutiba lir.
Congress yimsüsüdang Prime Minister Indira Gandhi mapang 1971 nung Pakistan agi ana kümtsür sepai taküm meyirijang tokur pungu pua takaba hatir ajak rakzük. Idangji Congress teloki onoki ta ozü party ta ojang kata mejembi. Tang Pulwama nung CRPF aika tepsetdakja aika yirutsüba ya BJP teloki tamashi inyakba ajanga lir. Congress government-i kiralongrar (terrorist) tetsütitem Masood Azhar, Omar Sayeed, Mushtaz pua ayuba BJP mapang Foreign Minister Jaswant Singh-i anir oa Afghanistan Kandahar nung 24-12-1999 chiokba ajanga parnoki inyakba lir. Foreign Minister terrorist meiner senzübaji nüngshi yutsü mapa lir. Ano Modibai France nunger dang Rafale tayimtsü aliba ken o nung documents defence ministry office nung sama ta ashibaji alima tsüngdang tamamangtsü otsü lir. Naga nungerbo pai 04-08-2015 nungi mesüshiba kobika mesüshir. Ano Tuensang nung 22-01-2018 nangzükba kwika mapa kümtsüogo ta bilemer.
Naga nunger MLA ayatzüra maremer opposition nung kenüa meliteter shishi ama yokshir. Aser parnoki Modibaji Tsüngrem ama bilemer. Osang kaket nung 7 rebel MLAs back PDA 25-03-2019 tasür NPF MLA 7 yagi BJP aser NDPP temeyoktep government yarir ta angu. Aser parnok rongnung C.L.John tenünga angudang pai 08-03-2017 anogo “NPF would continue till the second coming of Christ” ta ashiba bilemteta, ano asen Kibuba Yisu tanaben aruba osang kecha mangashi nung ya koda asü pai NPF toktsür ajener ta bilemer. Ano yimsüsür Naga nübur meimer Tinujongshi aser Toshipokba nati ticket bener nomination agütsüba meyipa agiogo ta angashia tena nungi osang tajung angashitsü nübur ajaki yongyaa alidang 29-03-2019 tena kuli yamai angu. Tinujongshi appreciated the good governance, progressive development and stability of PDAs. Ano Toshipokba appreciated the PDAs stand as a facilitator to the ongoing Naga peace process to an early honourable and inclusive settlement. Kati terenlok mapa tajung aser manokshiba government, tanabubai Naga yimten yakta telemtetba kati arutsü nung temulung agüja inyakba government. Iba kuli ajanga tenati Rio BJP telok government yaritsü bilema ticket amyonga nomination withdraw asü.
Meimchir ajak tangatetba teshisadangba balala. Anungji tena tangatetba ya majung ta mashir. Ano Naga lima tesem balala shia nung terenlok mapa balala aor asünung lenir tajung Tinujongshi-i ashibaji aitsür masü. Saka PDA government arur küm ka sür tesadang aor aser parnoki anogo 100 tsüngda nung lenmang ajak yanglutsü nangzükba tanü tashi lenmang kecha nunga likolung kata intoka inyakba mangur. Kohima, Mokokchung, Dimapur yimti yimdong nung Bedomen drum ka ka ainba dang Nagalima lenmang yanglu ta majar. Onok area nungbo tang tashibo ano terenlok mapabo kecha inyaka maka. Ano asen yimsüsür Toshipokbai BJP, NDPP teloki Naga yimten ken o yakta telemtetba kati arutsü nendaka inyaker ta ashiba nungji aitsür masü saka BJP telok aser Riobai Nagalima yimjung ken o tatembang kati arua yakta telemtetba aginü asübo 29-01-2018 solution vs election tasür political party ajaki mulungtepa yimjung tama südaktsüdi election nung shilem magi-i ken anena atadi ta meyongnema nangzüktepba BJP teloki onoki aji memetet yangji sign asütsü onoki memela ta sür yangji signed asür par party nungi maridokla. Ano tasemnü APO-i 31-01-2018 onokbo election nungji shilem agia atentsü ta meshila. Anungji Rioba aser BJP teloki Naga yimten keno telemtetba yakta aginür ta asübaji inyaka aruba maparen jagi mesayur.
Süra Mitkar yimyim kechiba tamakitsü akümer. Kerala nung Khristantemi ochi mulung agi Khrista anemba telok anema lumir ta ashir. Mizoram aser Meghalaya nung Khristantemji Presbyterian teimba lir parnok Baptist kar dang lir. Aser par mitkar yimyim tashi nung BJP matokdaktsür. Süra Nagaland Baptist tamanger NBCC, ABAM, CLEAN ELECTION sarasadem yinzüjagi kechiba Kotak matonger aser Kibubai melangzür. Nisan asongbaji kechiba Pai mangur aser Amtsük meshi nung lung, Ango meshi nung Per agütsür. Iba tamakok tatishitsü ka bena arudi. 02-04-2019 BJP, NDPP election nübuyim Changtongya sub-division atema Riobai anir parnok aru. Parnokji BJP atema (India) nübu yimtsürtem lir. Yangji senden nung temoatsü meshia parnok takok ngudakjang ta Pastorbai sarasadema tenzük. Ano senden nung tangar party majung indang jembiba parnok akoktsü jembiba ajakji takok nung tembangdakjang ta tatem sarasadem tanabuba Pastorbai sarasadema senden tembang. Baptist tamangertem Rev, Pastor, missionary temi political party senden ajak nung oa temoatsü meshija takok ngudakjang ta sarasademtsüba agi NBCC, ABAM, CLEAN ELECTION mitkar yimyim Tsüngremi melangzür. Item ya memelenshi tashibo asen lima dangi temelenshi temoatsü melena atakatemang arutsü aser mitkar yimyim nung ochiba takokji mangutsü südi ta iba O senlok tatsüka nübur tangatetertemi shisadangtsü zülur.