Tripura CM balatsü olulu atema nisung 2 apu

Agartala, April 29 (Agencies): Tripura chief minister Biplab Kumar Deb kinungtsüi balatsü ken o ka benok ta taila osang prokshiba atema Deobar nikongtsütsü Tripura nung freelance journalist ka apu.
Iba nisung ya Saikat Talapatra lir ta jangjaogo aser pa West Agartala police-i apu.
Saikat Talapatra-i Facebook amshir Anupam Paul den tesentaktep aliba putetba sülen pa apu, ta Assistant Inspector General (AIG) Subrata Chakraborty-i ashi.
Anupam Paul-i chief minister Deb tenüng menüktsüba, taila kulitem amshiba aser tasa tamajung atongba atema tai tonglokja lir.
“Chief Minister tenüng menüktsüba indang maparen nung shilem agiba atema onoki Saikat Talapatra apu” ta Chakraborty-isa ashi.
Deobarnü police-isa constable ka apu. Iba constable yagi Facebook nung chief minister Deb kinungtsüi balatsü shidi züluba indang osang prokshi.
Tripura police constable ji Jamal Hossain ta jangjaogo aser pai Facebook account nung CM Deb indang ashishitep aketba osang ka prokshi, ta Tripura police ketdangser kati ashi.
Jamal Hossain apuba sülen pa mapa nungi anenja lir, ta paisa ashi.
Kinungbo den balatsü onük benok ta taila osang prokshiba sülen Tripura CM kinungtsü Niti Deb-i Facebook account nung iba ya taila osang ka aser kar yimten tsütsü tajangzük angutsü atema olulu prokshiba dang lir ta osang jangjatsü.
2018 küm tashi Talapatra ya journalist ka ama inyak aser iba sülen pa freelance journalist ka ama inyaka arur.
“Tripura nung Emergency mesükba tensa ka küma lir. BJP-IPFT sorkar lutsürtem ajak tepuokdak ayur” ta Channel Hallabol nung editor Prashanta Bhattacharya-i ashi.