EC-i Maneka Gandhi dang tarutsü nungbo kümdangtsü metetdaktsü

New Delhi, April 29 (Agencies): Tawa Union Minister, Maneka Gandhi-i nüboyimba mapang la onük nung “ABCD” densema jembiba atema tanü Election Commission-i la aitsüogo.
Sultanpur nung nüboyimdang lai voters dang, la nem vote magütsüba tesemtem nung sorkar mapa inyaktsü asaker, ta jembia liasü.
EC-isa la dang tarutsü nungbo item ama oji mejembitsü tekümdangtsü metetdaktsüogo.
EC-i, Maneka Gandhi-i model code of conduct alema inyakba dang masü saka Representation of the People Act alema-a inyakogo, ta ashi.
April 14 nü Uttar Pradesh nung Sultanpur kübok Sarkoda yimdak election nüboyim sentong ka nung jembidang Maneka Gandhi-i, “Onoki Pilibhit nung takok ngua arur, saka kechiba onoki yim ka mapa tali inyaktsür aser ka nungbo mapa tera dang inyaktsür?, Kechiyong onoki yim ajakji A, B, C aser D ta shilem küma lemsar. Onoki vote shilem 80 dak tema anguba yimji A shilem nung dendaktsür, vote shilem 60 dak tema anguba yimji B nung, vote shilem 50 dak tema anguba yimji C category nung aser vote shilem 50 dang nungi tajemba anguba yimji D category nung dendaktsür,” ta jembia liasü.
Laisa, “Terenlok mapatemji mezüng A category yimtsüngtem nung inyaker. Iba sülen B yimtsüngtem, aser iba sülen ang C yimtsüngtem nung terenlok mapa inyaker,” ta la jembia liasü.
Item o jembiba atema April 15 nü Election Commission-i la narong mesüka ghonda 48 nüboyim sentong nung shilem magidaktsüi liasü.