Cong-i Modi aser Amit Shah na anema SC nung temepishiba agütsü

New Delhi, April 29 (Agencies): Congress-i Election Commission dang Ato kilonser, Narendra Modi aser BJP Tir, Amit Shah nati election atema nüboyim sentong nung jembidang model code of conduct (MCC) alema inyakba atema tena anema temerenshi agütsütsüla, ta mepishiaka EC-i mangashi ama toktsüba ajanga tanü Congress MP aser party women wing president, Susmita Dev-i tena anema Supreme Court nung temepishiba ka agütsüogo.
Congress tenüng nung jembir senior advocate, AM Singhvi-i Chief Justice of India, Ranjan Gogoi-i aniba bench ka dang Dev-i agütsüba temepishiba ken oji tekaraba nung angadangtsüla, ta mepishi. Ajioda SC-i iba kenoji asüng, Mongolbarnü angadangtsü melungogo.
Dev-i ashiba agi, election atema nüboyimba mapang nung Modi aser Amit Shah nati tesempa o jembiba aser sepaitem tetshiba ajanga MCC alema inyakba kuliji party-i EC nem agütsüogo.
Dev-i, “PM aser Shah Modi nati sepaitem tetshiba atema onoki EC nem tashishiba ken o ti agütsü, ajisüaka kechiba parnok anema temerenshi magütsür? Onoki mepishibaji EC-i thitsütsü akok, ajisüaka parnok anema meinyakbaji ozüng alema lir,” ta ashi.
Modi aser Shah nati MCC alema inyakaka EC-i ola madokba atema Congress-i EC dang tasüngdangba akaba sülen tanü EC anema ken o agütsür.
Yashi-a Congress lenir, P Chidambaram-i, BJP-i alia oa inyakba mapatem aser Modi-i jembiba otem EC-i mangu aser mangashi atemer toktsür; linük nüburtem matsüngdang EC-i tamakok nguogo, ta aija liasü.
Interview ka nung jembidang pai, “EC-i linük nüburtem matsüngdang tamakok nguogo. BJP-i alia inyakba, Modi-i jembiba otem aser sen jenti indokbaji parnoki (EC) mangu ama toktsür,” ta aitsü.