NE nung tzünglu peria marur; Tatsük-talem tali

Guwahati, April 29 (Agencies): Northeast kübok tesem kar nung anü kanga apur aser tesem kar nung tzünglu terara arur.
Taoba hopta tsüngda Assam, Mizoram aser Tripura nung anü tatsükji 35 degrees Celsius aser 38 degrees Celsius tsüngda liasü, ta India Meteorological Department (IMD)-i ashi.
March 1 nungi tenzüker May ita tsüngda Sikkim dak alaka tanüngba NE state 7 nung akhi ama masü saka tzünglu kanga ajema aru, ta IMD-isa metetdaktsü.
Arunachal Pradesh meteorological sub-division nung tzünglu timba arubaji 47 mm liasü, iba sülen Assam aser Meghalaya sub-division nung 33mm aru aser Nagaland-Manipur-Mizoram-Tripura sub-division nunga 28 mm aru.
Sikkim aser temeket nungbo March 1 nungi tenzüker tzünglu 152 mm tashi peria dang aruogo.
Indian Ocean aser Bay of Bengal nung depressions aser cyclone ‘Fani’ ajanga northeast tsütsü mopung tatsük süir, ta IMD Director Dilip Saha-i ashi.
“Cyclone ontemba sülen, mopung aonba melenshitsü aser tatsük ajema akümtsü. Anogo ana-asem ka tsüngda mopung akhi ama tzü-mopung akümtsü imlar” ta Saha-isa ashi.
Assam, Mizoram aser Tripura nung Agriculture ketdangsertemi ashiba agi, tzünglu shitak marura tsünüsenbongtsü aika raksatsü.
Tzünglu peria maruba ajanga tesem aika nung tzü tajemtsü dena peria mangur.