NSCN(IM)-i Manipur nung ceasefire telatetba alema inyak

Kohima, April 29 (TYO): Manipur kübok Ukhrul district nung NSCN-IM-i ceasefire ground rules alema tesep ka tentet, ta Indian Army-i ashi.
April 25 nü teti inyakba ama sepaitemi tayimtsü ajanga tesem repranga senzüdang “Sihai Khunou/Khamasom, Ukhrul” anasa arem nung ki kar yanglua aliba angu.
NSCN-IM-i iba tesem nung ozüng alema tesep yangluba osang jangjatsü atema sepaitem iba tesemi yok, ta PRO (Defence) Col C Konwer-i ashi.
Iba mapang army commander-i yimdaklirtem aser pastor dang NSCN-IM züngsemtem tesep toktsür aotsü atema shiang kechiyong iba ya ceasefire ground rules alema lir ta osang sangoktsü.
Kasa anogo United Naga Council nung General Secretary-i phone ajanga iba tesem nung NSCN-IM camp aliba osang jangjatsü.
Iba osang ya Inspector General of Assam Rifles-i Ceasefire Monitoring Group (CFMG) nung chairman nem sangoktsü.
April 27 nikongtsütsü 2.15 ako meta CFMG Chairman-i NSCN-IM tesep agientsü atema tetuyuba agütsü aser iba nung ajemdaker Assam Rifles-i yimdaklirtem dang telungpurtemi tesep toktsür ao asü mao ta asüngdang.
Iba ozüng alema tentetba tesep ya sepaitemi nüka mitdar. April 27 anepdang tayimtsü ajanga iba tesem mita reprangdang telungpurtemi tesepji toktsür ano mao liasü.
NSCN (IM) züngsemtemi mebilemdangi inyakba ajanga iba temeket nung yimdaklirtemi timtem ajurur. Tang tashi nung sepaitemi aremzüka dang arudar.
Deobarnü yimdaklir kar tesep jagi yok aser parnoki Lt Col David Rambo den ajurutep saka pai Hebron nungi tetuyuba arutsü atar ta langzü.
NSCN-IM-i iba tesep toktsür maoba ya ceasefire ground rules alema inyakba mapa ka lir aser tarutsü nung timtem kar adokra ibaji NSCN-IM ketdangsertemi abentsü, ta PRO (Defence)-i metetdaktsü.
India sorkar aser NSCN-IM tsüngda 1997 küm ceasefire tenangzüktep agia liasü.