Tseminyu nung ‘Plastic Waste Management’ sentong agi

Dimapur, Rongchii/April 30 (TYO): Plastic Waste Management awareness campaign, Christian School Tseminyu nung April 30 nü agiogo. Iba sentong nung o jembidang EAC Tsogin, Rozy Sangtam-i, kaketshirtem dang plastic waste management dak sendakba nung tangazükbatem kidang tsürapurtem den lemsateptsü asoshi ajungshi. EAC-isa parnok dang plastics agi alima menenba anepalutsü asoshi jenjang tongtibang asem agitsü ajungshi. Jenjan asem ya, plastic mamshitsü, anogo shi asen libaliro nung plastic amshiba tajemba kümdaktsütsü mesera recycling atema bendena ayutsü.
Plastic bags mamshidaktsütsü atema kaketshir, tesayur aser sentong nung dena aliba ketdangsertem nem sü agi yangluba yangkhu lemja liasü.
Rozy Sangtam-isa, sü agi yangluba yangkhu lemtsüba ajanga Tseminyu jila ya plastic free jila ka kümogo, ta sentepa aliba lokti nem metetdaktsü.
BHSS Tseminyu nungi kaketshir Njini Thong aser tangari plastic waste management dak sendakba nung o tatsütsü jembia liasü.
Iba sentong ya Tseminyu town council-i Swachh Bharat Mission kübok ayongzüka agi, ta ketdangser sangdong ka ajanga metetdaktsü.