CMC-i achayanga Mokokchung jila nung waste-bin 20 amenoktsütsü

Mokokchung, April 30 (TYO): State Bank of India (SBI)-i teyari agüja yangluba jana bendenba pong ‘waste-bins’ metsü (20) April 30 nü Mokokchung Additional Deputy Commissioner & Mokokchung Municipal Council (MMC), Administrator, W. Manpai Phom aser SBI (RBO), AGM Helun Hangshing nati külem sür MMC conference hall nung meraketa lapoktsüogo. Iba mapa ya Clean Mokokchung Campaign (CMC)-i achayanga inyak.
Tanü iba waste-bin lapokba sentong nung Mokokchung ADC & MMC Administrator, W. Manpai Phom-i Clean Mokokchung Campaign-i Mokokchung yimti merükba aser plastic anema raraba maparen nung yakyaka tongti shilem agiba asoshi pelaba lemsatepa liasü.
Jila merüka tobur jungdaktsütsü nükla tulu angateta SBI-i teyari agütsüba asoshia pelaba den tarutsü nunga iba ama yariteptsü imlar, ta paisa ashi.
SBI (RBO), AGM, Helun Hangshing-ia mapang tatsüka agidang, Clean Mokokchung Campaign-i Mokokchung merüka ayutsü nükla nung mapatong (project) tajung atongba ngua kanga pelaa bilemogo, ta ashi. Iba ama mapatong tajung ya tanga district-temia angazüka inyaktsüla, ta paisa mulungsü o ka shisem.
Waste-bin 20 ya Mokokchung town kübok ward balala nung amenoktsütsü, ta CMC ketdangsürtemi metetdaktsü.
CMC telok ya 2018 January nung tentet aser par telok yagi plastic anema raraba mapa aser merükmejuba aser Mokokchung jila tobur jungdaktsütsü asoshi mapatong tapu balala inyakba den school aser riju balala semdanga parnoki iba dak sentakba indang nüburtem nem angatetdaktsütsü meranga inyaker.